Jaqynda  reseılik ınternet-basylym - Life News  áleýmettik jelidegi óziniń resmı paraqshasynda «Ýkraına Prezıdentiniń  «Borat» fılmindegi ándi Qazaqstannyń «gımni» dep oryndatyp qoıǵan 10 mınýttyq vıdeony» jarıalaǵan bolatyn.  Bul týraly «Qamshy» portaly qoǵam qaıratkeri Murat Ábenovtyń «Feısbýk» áleýmettik jelisindegi resmı paraqshasyna silteme jasaı otyryp habarlaıdy.  Qoǵam qaıratkeriniń áleýmettik jelidegi málimdemesi qazaqstandyq BAQ-ta jarıalanǵan.  Onda Murat Abdýlamıtuly – QR Rámizin mazaq qylǵan vıdeoǵa QR azamaty retinde beıjaı qaramaıtynyn jáne bul vıdeony taratýshy arnanyń kórsetilimderin Qazaqstan aýmaǵynda jabý kerektigin aıtqan. Sondaı-aq, málimdemede  atalmysh provakasıalyq vıdeoǵa bizdiń quzyrly organdar lám-mım dep ún qatpaǵandyǵy aıtylǵan.

 «Men Qazaqstan Respýblıkasynyń azamaty retinde myna vıdeo meniń namysyma tıedi. Reseılik ınternet-basylym Life News ózderiniń áleýmettik jelilerdegi resmı paraqshasynda Ýkraına prezıdenti Petr Poroshenkonyń Qazaqstan Respýblıkasy «gımniniń» ornyna «Borat» fılmindegi Qazaqstandy mazaq qylǵan maǵynasyz ándi oryndap turǵany beınelengen vıdeony jarıalaǵan. Al QR Konstıtýsıasyna sáıkes, Life News arnasy Qazaqstan terıtorıasyndaǵy arnalary jabylýy tıis. Sot saraptamasyna deıin biz Qazaqstandy mazaq qylǵan vıdeony paraqshadan óshirýdi talap ete alamyz. Olar atalmysh vıdeony óshirip, bizden keshirim suraýy tıis. Biz buǵan quqylymyz. Meni tańqaldyratyny bizdiń Basprokýratýra mundaı maǵynadaǵy dúnıelerge bylq etpeıdi de. Qandaı da bir reaksıa bolý kerek qoı»,-deıdi Murat Ábenov myrza.

Sondaı-aq, bizdiń sheneýnikter de jaýapqa tatylýy tıis, - deıdi qoǵam qaıratkeri. Onyń pikirinshe, bizdiń sheneýnikter Qazaqstan terıtorıasy aýmaǵynda taratylatyn barlyq elektrondyq BAQ-ty baqylaýda ustaýǵa tıis.

«Biz bul zańdardy tek ózimizdiń BAQ-ty jazalaý úshin ǵana qabyldamaımyz ǵoı. Álde, ádettegideı qudaıy kórshimizdiń bassyzdyǵyna úndemeı, dospyz dep qoıa salamyz ba?! Men Qazaqstan Respýblıkasynyń azamaty retinde meniń elimniń ujdanyn qorǵaýdy talap etemin. Eger kerek bolsa, resmı qýdalaýǵa deıin daıynmyn, bul isti»,-deıdi Murat Ábenov.

Ras. Qazaqstan Respýblıkasynyń memlekettik rámizderi osymen birinshi ret qorlanyp otyrǵan joq. Bildeı bir olımpıadalarda atasy quryǵyr «Borattyń ánin» QR Ánurany retinde qoldandy, qasıetti kók týymyzben qoqysty tasyp, kúresin japtyq, ish kıim etip butqa oradyq. Iá,  Memlekettik rámizimizdi qorlaǵandardyń eshqaısysy da tıisti jazalaryn alǵan joq. Al kerisinshe, patrıotızmniń úlgisin kórsetip, kók týymyzdy kókke kóterip, qazaqstandyq kásipqoı boksshy Gennadıı Golovkınniń jeńisinen keıin balkonǵa ilip qoıǵan jigitke aıamaı kelip aıyppul salamyz-aý.

Al ózge memlekettiń bildeı bir telearnasy – Qazaqstannyń ánuranyn ashyqtan-ashyq mazaqtasa da bizdiń Bas prokýratýra bylq etpeıdi. 

Nuzat Toǵjan