2017 jyly aqpanda "Muhtar Áblázovtiń aqshasyn gazet shyǵarý arqyly zańdastyrýǵa qatysty" degen kúdikpen Almatyda qamaýǵa alynyp, jeti aıdan keıin sot úkimimen bostandyǵy úsh jylǵa shektelip, bosap shyqqan opozısıadaǵy belsendi, táýelsiz jýrnalıs Janbolat Mamaı ózin qaıtadan "polısıa qamaýy múmkin" dep kúdiktenedi. Bul týraly ol búgin, 9 qarashada Facebook-taǵy paraqshasynda málimdedi. 

Mamaıdyń aıtýynsha, 9 qarasha kúni kúndiz saǵat 14.00-de onyń úıine Almaty oblysy Qarasaı aýdany ishki ister bóliminiń probasıa qyzmetkerleri kelip, sol  ýaqytta úıinde bolmaýyna baılanysty týystaryna jazbasha eskertý tastap ketken. Keıin, keshki saǵat 20.30 shamasynda Mamaıdyń úıine probasıa qyzmetkerleri taǵy kelip, 11 qarasha kúni probasıa qyzmetine kelý týraly shaqyrtý qaǵazyn bergen. Belsendiniń sózinshe, probasıa qyzmetkerleri bergen shaqyrtý qaǵazynda 11 qarasha kúni óziniń "bostandyǵyn shekteý" jazasyna baılanysty másele qaralatyny týraly jazylypty. 

Mamaı ózine jasalǵan eskertýdiń zańsyzdyǵyn jáne probasıa qyzmetine shaqyrtylýyn saıası belsendiligin shekteý úshin bılik tarapynan jasalynyp otyrǵan áreket ekenin aıtty. 

"Bul - tap-taza saıası astary bar, saıası negizdegi qysym dep bilemin. Óıtkeni men probasıa qyzmetinde 2017 jyldyń 29 qyrkúıeginen bastap baqylaýda turmyn. Biraq osy ýaqytqa deıin meni birde-bir ret kúndiz úıime kelip teksergen emes, senbi, jeksenbi kúni kúndiz kelip teksergen emes. Tekserse, keshki 22.00-den keıin (ıaǵnı zań boıynsha men sol ýaqytta úıde otyrýym kerek) tekseretin. Dál osy kúni tekserip, dál osy kúni kelgenine qaraǵanda, bul - saıası astary bar qysym. Men áli de zań boıynsha probasıa qyzmetiniń tirkeýinde bolýym kerek bolatyn. Maǵan kóktemde bir ret «Polıton" klýbyn júrgizdi dep bir eskertý berdi, Endi taǵy bir eskertý beriletin bolsa, (ol eskertý beriletin sıaqty dúısenbi kúni) onda meni qaıtadan túrmege qamaýy múmkin" - dedi Mamaı óziniń Facebook arqyly jasaǵan málimdemesinde. 

Buryn "Saıası qalam - "Trıbýna" gazetin basqarǵan jýrnalıs, qoǵam belsendisi Janbolat Mamaı 2017 jyly aqpanda "Muhtar Áblázovtiń aqshasyn gazet shyǵarý arqyly zańdastyrýǵa qatysty" dep aıyptalyp, 2017 jyldyń qyrkúıeginde shartty jazamen bosatylǵan. Sot oǵan úsh jyl jýrnalısik qyzmetpen aınalysýǵa tyıym salǵan. Janbolat Mamaı ózine taǵylǵan aıypty moıyndamaǵan. ​

16 qazanda Janbolat Mamaı jańa opozısıalyq partıa quratynyn málimdegen. Qarasha aıynyń basynda Mamaı opozısıalyq parıa qurǵaly otyrǵan bastamashyl toppen birge 2-8 qarasha kúnderi Qazaqstannyń batys óńirin aralap, jaqtastarymen kezdespek bolǵan. Biraq 1 qarashada Almaty oblysy Qarasaı aýdanynyń probasıa qyzmeti oǵan qaladan shyǵýǵa tyıym salǵan. 

♦Oqı otyryńyz: Janbolat Mamaı: Toqaev ta, Nazarbaev ta popýlızmmen aınalysyp otyr