Marqum Aıarý Ermek otbasynyń úlkeni bolǵan. 10 jasar qyz karate jáne bımen aınalysqan dep jazady Qamshy.kz aqparat agenttigi mgorod.kz saıtynyń deregin negizge alyp. 

Ákesiniń aıtýy boıynsha, Aıarý karateden álem chempıony bolýdy armandaǵan. Ol basqalardan tózimdiligimen, tabandylyǵymen erekshelengen. 

" Mundaı qaıǵyly jaǵdaıda maǵan birnárse deý qıyn. Úlken qyzym daıyndyqtan qalmaıtyn, kúni keshe ǵana ájesimen birge karatege bardy. Jaıaý júrginshiler jolynan ótip bara jatqan kezde qyzymnyń qolynda qarańǵyda kózge anyq kórinetin lenta bolǵan.  Keıin ózin eshkim soqqyǵa jyǵa almaıtynyn, mashınalardyń ózderi toqtaıtynyn aıtypty. Sonymen qatar ol kórkem gımnastıkamen, bımen de áýestendi. Únemi jarystarǵa qatysyp, respýblıkalyq chempıonattarda júldeli oryndarǵa ıe boldy. Ol óte qabiletti bolatyn, 5 jyl ishinde Sankt-Peterbýrgtegi halyqaralyq festıválde qazaq bıimen birinshi oryndy jeńip aldy. Karateden jattyqtyrýshysy Aıarýdan úlken úmit kútti, tipti ony tegin jattyqtyra bastady", - dedi marqumnyń ákesi Asylhan Qazıev.

Asylhan Qazıevtiń aıtýynsha, jol apatyna kináli taraptan bir adam kelip keshirim suramaǵan. Aıarýdyń ózinen keıin 3 sińlisi bar. Qyzdyń ákesi Ǵ.Qurmanǵalıev atyndaǵy fılarmonıada jumys isteıdi. Ol  qalada kúıshi retinde tanymal. Al anasy «Aqjaıyq» bı ansambliniń jetekshisi.

Eske salaıyq, 20 qarashada saǵat 20.50-de Oral qalasy Nur kóshesiniń 5-shaǵynaýdanynda belgisiz júrgizýshi 10 jasar qyzdy qaǵyp ketip, oqıǵa ornynan izin sýytqan. Jedel járdem kelgenge deıin qyz oqıǵa ornynda qaıtys boldy. Araǵa biraz ýqaty salyp kúdikti ustalyp, ýaqytsha tergeý ızolátoryna qamaldy. Bul is boıynsha sotqa deıingi tergeý bastaldy.