Qazaq ulty búgin asa qaýipti de qaterli kezeńde tur. Barlyq jaǵynan alyp qarasańyz da solaı. Saıasatkerlerdi bylaı qoıǵanda, kez kelgen kózi qaraqty qazaq azamaty sońǵy jyldary ulttyq máselede, qundylyqtarymyzdy jańǵyrtý baǵytyndaǵy jumystarda alǵa basýdan kóri keri ketýshiliktiń basym bolǵanyn anyq ańǵarady. Iá, memlekettik deńgeıdegi qazaq tiliniń jaǵdaıy múlde syn kótermeıdi. Esesine, bizdiń bıliktiń bıik dálizinde júrgender jaǵympazdyq jarysynan aldaryna jan salmaýǵa kirisip ketkendeı quddy. Jo-joq. Prezıdent Nazarbaevtyń saıası karerasyna, sińirgen eńbegine eshkim kóz alartyp qaramaıdy, árıne. Jaqsylyq aıtylýy tıis, eger... Tek munyń aıaǵy jeke basqa tabynýshylyqqa ulasyp ketpesine kim kepil? Sonymen, «Qamshy» portaly sońǵy kezderi qazaqstandyq saıasatkerler men kásipkerlerdiń Prezıdent Nazarbaev aldynda jekelegen ımıjdaryn kóterý úshin jasaǵan kúlkili hám ersi áreketterin nazarlaryńyzǵa usynady.
1. Mádenıet jáne sport mınıstri Arystanbek Muhamedıuly Prezıdent aldynda qurdaı jorǵalaıtyn sheneýnikterdiń kóshin bastaýǵa ábden laıyqty adam desek, artyq aıtpaǵan bolar edik. Jaqynda Astana qalasynda ashyq aspan astynda «Aıda» operasy qoıyldy. Arystanbek Muhamedıuly operany qoıý úshin el búdjetinen 150 mln tengeni tipti aıaǵan da joq.
1.1 Sonymen qatar, mınıstrdiń Elbasy sýretin Ulttyq murajaıǵa ilý úshin 130 mln teńgege kartına saldyryp jatqany da málim boldy.
1.2 Ótken jylǵy qarashadaǵy aýyr atletıkadan álem chempıonaty esińizde bolar. Ziltemirdi shyrq úıirgen Ilá Ilın tórtinshi márte álem birinshiliginiń altynyn qanjyǵasyna bókterip, Ánuranymyz oınalyp jatqanda Mádenıet jáne sport mınıstri Arystanbek Muhamedıuly zyr júgirip, uıaly telefonyn tebirenis pen tolǵanys ústinde turǵan Tolaǵaıǵa sasyp-sabdyrap tyqpalaı berdi. Onysy azdaı, ánuranmen sharýasy joq sheneýnik bireý-mireý qońyraý shalyp qalar dep, qolyndaǵysyna qaıta-qaıta qaraǵyshtaýmen boldy. Iá, Prezıdent Nazarbaevtyń qońyraýyna jaýap bermeı qalsa, jaǵdaıy qıyndap keter edi ǵoı.
2. Nurlan Smaǵýlovtyń patsha aldyndaǵy jaǵympazdyǵy búkil áleýmettik jeli qoldanýshylarynyń kúlkisin keltirgeni bar emes pe?! EKSPO-2017 kórmesiniń ǵımaratyn tanystyrý sátinde Nurlan myrzaǵa Prezıdent Nazarbaev: «Basqa ataý tappadyń ba? Mega? Sen barlyq Qazaqstanǵa ózińniń megańdy tyqpalap boldyń ǵoı» degende ákki kásipker «Bizdiń basqasha ataýymyz bar. Nurplaza dep atasaq qalaı bolady? Eger siz ruqsat berseńiz, árıne»,- dep jurtty kúldirip edi. Nurlan myrzanyń jaǵympazdyǵyna qaıran qalǵan Elbasynyń ózi: «Kúlip jiberip, men ol úshin aıtyp otyrǵanym joq. Sen osylaı ádemi jaǵympazdanýdy qaıdan úırengensiń?» dep suraqty tótesinen qoıǵan. Sonda Smaǵulov seri sekem aldyrmastan «Ómir úıretti, Nursultan Ábishuly!» dep jaýap qaıyrǵan bolatyn.
Iá, Prezıdent Nazarbaevqa qarata jaǵymsynýshylar nendeı teńeýlerdi aıtpady deseńizshi? «Aq Patsham», «Men Nursultan Nazarbaevty Nuh Paıǵambarǵa teńer edim», «Nursultan Ábishuly – Muhammed paıǵambarǵa teńeýge turarlyq», «Oǵan Halyq qaharmany ataǵyn berý kerek» dedi, t.b. Al siz qandaı jaǵympazdyqty bilesiz?
Nurgeldi Ábdiǵanıuly
«Qamshy» silteıdi
