Qyzyq boldy. Qyzyq emes, shyjyq boldy. Já, basynan bastaıyq. Telefonymyz shyr ete qaldy. Qońyraý astanadan soǵylypty. Ózin Zaıyrbek Musabekovpin dep tanystyrǵan jigit aǵasy amandyq-saýlyqtan soń áńgimesin birden: "Taıaýda Máshhúr Júsip Kópeevtiń 20 tomdyǵyn satyp alǵan edim" dep bastady. Áńgime arasynda: "Ózim Muhtar Shahanovtyń jankúıerimin, ári talaı óleńderin jatqa bilemin" dep te qoıdy. "Sol jatqa bilgenimniń arqasy ǵoı, álgi Máshekeń kóptomdyǵynyń 16-shy tomyn ashyp qalsam, Muhtar aǵamyzdyń "Jańǵyryq" atty poemasy kózime ottaı basyldy" dedi. Men óz tarapymnan: "Sonda Muhańnyń poemasy Máshekeńniń atynan jarıalanǵan ba?" dep suradym. Ol: "Iá" dep jaýap qatty. Sodan keıin-aq mán-jaıǵa odan ári qanyǵa tústim. Tap sol kezde bólmeme Muhańnyń ózi de bas suǵa qaldy. Ol kisige jaǵdaıdy eki aýyz sózben túsindirdim de, telefondy qolyna ustata qoıdym. Áńgimege qanyqqan Muhań: "Sonda men ol poemany Máshekeńnen baıqatpaı urlap alǵan bolyp shyǵamyn ba?" dedi. Arǵy jaqtaǵy daýys: "Solaı bolatyn sıaqty" dese kerek. Muhań: "Men bireýden bir jol óleń urlaǵansha asylyp óle salmaımyn ba?!" dedi de telefondy qaıtadan ózime usyndy. Men Zaıyrbekke: "Álgi kitaptyń bizge qatysty jerlerin sýretke túsirip jiberińiz" dedim. İle Zaıyrbektiń jibergen málimetteri telefonyma túse bastady.

20 tomdyq kitap 2013 jyly jaryqqa shyqqan eken. Kitapty Máshekeń urpaqtary qurastyrǵan kórinedi. Bas redaktory - Erlan Aryn. Ol kisi kitapqa Pavlodar oblysyna ákim bolyp turǵan kezde qolǵabys jasasa kerek. Redaksıanyń alqa músheleri de óńsheń yǵaı men syǵaılar. Kitapta M. Shahanovtyń "Jańǵyryq" poemasy "Júdeı han men Aqsaq temir" óleńi dep berilipti. "Óleń áýlettik muraǵattaǵy Áshim Qaraqyzuly kóshirmesinen alyndy" delingen. Endi atalmysh óleńniń Máshekeńdiki ekendigine kúmán qaldyrmaǵan. Tipti Muhtar Shahanov týraly bir aýyz sóz joq. Eń bolmasa: "Shahanov ta osy yńǵaıda birdeńke jazǵan" dese, bolmasa: "Urlap alǵan" dep ashyq aıtsa biz de osy ýaqytqa deıin bir habaryn biler edik qoı. Eger Zaıyrbek baýyrymyz qyraǵylyq tanytpaǵanda bul másele osylaısha jabýly kúıinde qala berer me edi, kim bilsin?! Biraq shyndyq erteńgi kúni báribir ashylady ǵoı. Sol kezde Shahanovtyń urlyqshy bolyp shyǵa kelýi kúmánsiz. Sondyqtan mán-jaıdy anyqtaý úshin sotqa júginýge týra keledi. At shapan aıyptan buryn jaýapty adamdardyń keshirim suraǵany qymbat. Bárinen buryn ádildiktiń saltanat qurǵany kerek.

Eske túsireıik, M. Shahanovtyń "Jańǵyryq" atty poemasyn kóp jurt jatqa biledi. Poemadaǵy oqıǵa sán-saltanaty jarasqan bir hannyń aldyn aıaǵy aýyr áıeldiń baıqamaı kesip ótýi arqyly órbıdi ǵoı. Ashýǵa mingen han ol áıeldi ishinen teýip óltiredi. Alaıda jaryǵy bar bala ómirge keledi. Keıin tarıh dońǵalaǵy keri aınalady. İshten aqsaq bolyp týǵan bala 17 jyldan soń sol jerde álgi hannyń basyn alady. Osy oqıǵa 20 tomdyqta Máshekeń atynan ózgerissiz qaıtalanady. Qyzyq! Endi shyjyqqa aınalyp ketpeı turǵanda máseleni sheshý kerek. Erlan Aryn myrzanyń, jalpy 20 tomdyqqa jaýapty adamdardyń sotqa deıin aıtar ýájderi bolsa keshikpegenderi jón.

Qudıar Biláldiń feısbýk paraqshasynan alyndy