Aqmola oblysynyń Bulandy aýdanynda turǵyn úıden órt shyǵyp, eki adam kóz jumdy. Bul aqparatty Aqmola oblystyq tótenshe jaǵdaılar departamentiniń baspasóz qyzmeti habarlady. 

Vedomstvonyń málimetinshe, órt qańtardyń 3-de keshki saǵat 18.05 shamasynda Otradnoe aýylyndaǵy jeke turǵyn úılerdiń birinde bolǵan.

"Órt 2 sharshy metr aýmaqty sharpydy. Úı ishinen 65 jastaǵy úı ıesi men 56 jastaǵy áıeldiń máıiti tabyldy. Ýchaskelik polısıa qyzmetkeriniń aıtýynsha, ekeýi de alkogóldi ishimdikke áýes bolǵan" - delingen tótenshe jaǵdaılar departamenti taratqan habarlamada. 

Vedomstvonyń túsindirýinshe, órttiń shyǵýyna ot jaǵý kezinde qaýipsizdik erejesiniń saqtalmaýy sebep bolǵan. Oqıǵa ornyna órtke qarsy qyzmet shaqyrylmaǵan.