Qýǵyndaǵy qazaqstandyq eks-bankır Muhtar Áblázovtyń "sybaılasy" delingen reseılik kásipker Aleksandr Ýdovenko Vashıngton mańyndaǵy qalalardyń birinde ustalǵannan keıin AQSH sotynda jaýap berdi. Bul týraly Eureporter.co aqparat agenttigi habarlady.

Aleksandr Ýdovenko 2009 jyly Londonnan qashyp ketkeli beri is-tússiz. Basylymnyń jazýynsha, Ýdovenko Londonda Ábilázovtyń múddesi úshin jumys istegen jáne "BTA Bankinen" mıllıardtardy jeke shottarǵa aýdarý úshin paıdalanǵan ofshorlyq kompanıalardyń keń jelisin qurýǵa qatysqan. Keıin Ýdovenko Amerıkaǵa kóship, Merılend shtatynda "ınvestısıalyq keńesshi" bolyp jumys istegen.

Basylymnyń habarlaýynsha, brıtan soty reseılik kásipkerdiń "Áblázovtyń basty seriktesteriniń biri" bolǵanyn anyqtaǵan. Sot aıyptaýynda ol "urlanǵan aqshany tasymaldaý úshin paıdalanylǵan júzdegen ofshorlyq kompanıalardyń" nomınaldy ıesi jáne ákimshisi retinde áreket etkeni aıytylǵan.

Aktıvi jaǵynan Qazaqstandaǵy eń iri bankterdiń biri bolǵan BTA bank jetekshisi Muhtar Áblázovti Qazaqstan bıligi 2017 jyly "mıllıardtaǵan somany jymqyrdy", "qylmystyq top qurdy" dep aıyptap, 20 jylǵa sottady. Keıin, 2018 jyly ony "adam óltirýge tapsyrys berdi" degen aıyppen ómir boıyna bas bostandyǵynan aıyrý jazasyna kesti. Al 2018 jyldyń naýryz aıynda Astana soty Áblázov qurǵan QDT (Qazaqstannyń demokratıalyq tańdaýy - red.) qozǵalysyn "ekstremıstik uıym" dep tanydy. 2009 jyldan beri shetelde turatyn Áblázov bul aıyptardyń báriniń saıası astary bar ekenin aıtyp, joqqa shyǵaryp keledi.