Búgin, 22 qańtarda Qazaqstannyń burynǵy prezıdenti Nursultan Nazarbaevtyń jıen nemeresi, Qazaqstan parlamenti senatynyń qazirgi spıkeri Darıǵa Nazarbaevanyń uly Aısultan Rahat Facebook-taǵy paraqshasynda birneshe post jazdy. Nazarbaevtyń nemere jıeniniń jazǵandary qazir jelide qyzý talqylanyp jatyr. 

Aısultan Rahat búgingi jazǵan postarynyń birinde Nursultan Nazarbaevtyń uly ekenin jazdy. 

"Meniń anam atamdy men onyń balasy bolǵandyqtan, qarmaqta ustady" dep jazdy Aısultan Rahat. 

Bul aqparattyń ras ıa jalǵan ekenin bilý maqsatynda Aısultan Rahat feısbýk paraqshasynda kórsetken telefon nomerge habarlastyq, biraq baılanysa almadyq. Degenmen Holanews.kz saıtynyń jýrnalıseri Aısultan Rahatpen sóılesip, suhbat alǵandaryn jazdy. Sol suhbatta Aısultan Rahat feısbýktaǵy barlyq jazbany ózi jazǵanyn rastaǵan. Jáne "Kóp jyldan beri bizdiń otbasymyzda kóptegen jaǵdaılar boldy jáne ol búkil memleketke áserin tıgizdi" dep aıtqan. 

Ótken jyly qazannyń 18-i kúni London soty Aısultan Rahatqa bir jyl shartty jaza kesti. Brtanıalyq BAQ-tardyń jazýynsha, ol 2019 jyly maýsym aıynda brıtan polısıasyna qarsylyq kórsetkeni úshin jaýapqa tartylǵan. Nazarbaevtar otbasy Aısultan Rahattyń Ulybrıtanıada ustalǵany jáne sottalǵany jaıly eshqandaı málimdeme jasaǵan joq.

1990 jyly 26 tamyzda ómirge kelgen Aısultan Nazarbaev – Qazaqstandy 30 jylǵa jýyq úzdiksiz bılep, 2019 jyly naýryzda óz erkimen prezıdenttik qyzmetten ketken (biraq eldegi bıliktiń bir tarmaǵyn ustap otyrǵan)  Nursultan Nazarbaevtyń úlken qyzy Darıǵa Nazarbaeva men Avstrıa túrmeleriniń birinde kóz jumǵan qazaqstandyq sheneýnik Rahat Álıevtiń uly.

Qazaqstandyq aqparat quraldarynyń jazýynsha, Aısultan Rahat bala kezden fýtbolǵa qyzyqqan. 2006 jyly Qazaqstannyń jasóspirimder quramasynyń sapynda Eýropa chempıonatynyń irikteý týrnırine qatysqan. "Chelsı" jáne "Portsmýt" jastar komandalary men qazaqstandyq "Astana" komandasynda oınaǵan.

Ol Ulybrıtanıa koroldiginiń "Sandherst" áskerı akademıasynyń támamdaǵan. Aısultan oqýyn bitirip, Qazaqstanǵa oralǵan soń eldiń qorǵanys mınıstrliginiń barlaý basqarmasynda qyzmet etti. 2017 jyly 7 aıdaı Qazaqstan fýtbol federasıasynyń vıse-prezıdenti qyzmetin atqardy. 

Aısultan Rahat 2013 jyly "QazRomGaz" AQ basshysy, almatylyq "Qaırat" fýtbol klýbynyń qojaıyny Qaırat Boranbaevtyń qyzy Alıma Boranbaevǵa úılendi. 2016 jyldyń jazynda olardyń Amelı esimdi qyz dúnıege keldi.