Keshe, 22 qańtarda Qazaqstannyń burynǵy prezıdenti Nursultan Nazarbaevtyń jıen nemeresi, Qazaqstan parlamenti senatynyń qazirgi spıkeri Darıǵa Nazarbaevanyń uly Aısultan Rahat Facebook-taǵy paraqshasyna birneshe post jarıalady. Aısultan Rahat postarynda qazir Londonda ekenin, ózine qaýip tónip turǵanyn, Nursultan Nazarbaev onyń atasy emes, týǵan ákesi ekenin aıtty.

Aısultan Rahattyń bul jazbalarynan keıin qazaqstandyq birqatar jýrnalıser men belsendiler onymen baılanysqa shyǵyp, jazǵandarynyń ras, ıa jalǵan ekenin surady. Aısultan Rahat jazbalarynda aıtylǵan aqparttyń barlyǵy ras ekenin jáne ony eshkimniń buıryǵynsyz jazyp otyrǵanyn málimdedi.

Ol 22 qańtar keshke qaraı Youtube jelesindegi "Silk Road" arnasyna bergen suhbatynda Nursultan Nazarbaev óziniń atasy emes, bıologıalyq ákesi ekenin jaqynda bilgenin aıtty. Onyń aıtýynsha, bul aqparattardy kópshilikke aıtýyna sheshesi Darıǵa Nazarbaevanyń oǵan qaýip tóndirýi sebep bolǵan.

"Meniń anamnyń bir ǵana maqsaty bar: Qazaqstan prezıdenti bolý. Meniń bul ómirde bolýym oǵan kedergi bolyp tur. Óıtkeni atam (Nursultan Nazarbaev - red.) árdaıym maǵan bılikti bergisi keletin. Men bir-aq nárseni aıtqym keledi: ólerimniń aldynda atammen kezdeskim keledi" dedi Aısultan Rahat. 

Sondaı-aq, suhbat barysynda Aısultan Rahat óziniń týǵan ákesi Nursultan Nazarbaev bolsa da, ol ákesi retinde ózin tárbılegen Rahat Álıevti moıyndaıtyn jetkizdi. 

Ótken jyly qazannyń 18-i kúni London soty Aısultan Rahatqa bir jyl shartty jaza kesti. Brıtanıalyq BAQ-tardyń jazýynsha, ol 2019 jyly maýsym aıynda brıtan polısıasyna qarsylyq kórsetkeni úshin jaýapqa tartylǵan. Nazarbaevtar otbasy Aısultan Rahattyń Ulybrıtanıada ustalǵany jáne sottalǵany jaıly eshqandaı málimdeme jasaǵan joq.

1990 jyly 26 tamyzda ómirge kelgen Aısultan Nazarbaev – Qazaqstandy 30 jylǵa jýyq úzdiksiz bılep, 2019 jyly naýryzda óz erkimen prezıdenttik qyzmetten ketken (biraq eldegi bıliktiń bir tarmaǵyn ustap otyrǵan)  Nursultan Nazarbaevtyń úlken qyzy Darıǵa Nazarbaeva men Avstrıa túrmeleriniń birinde kóz jumǵan qazaqstandyq sheneýnik Rahat Álıevtiń uly.

Qazaqstandyq aqparat quraldarynyń jazýynsha, Aısultan Rahat bala kezden fýtbolǵa qyzyqqan. 2006 jyly Qazaqstannyń jasóspirimder quramasynyń sapynda Eýropa chempıonatynyń irikteý týrnırine qatysqan. "Chelsı" jáne "Portsmýt" jastar komandalary men qazaqstandyq "Astana" komandasynda oınaǵan.

Ol Ulybrıtanıa koroldiginiń "Sandherst" áskerı akademıasynyń támamdaǵan. Aısultan oqýyn bitirip, Qazaqstanǵa oralǵan soń eldiń qorǵanys mınıstrliginiń barlaý basqarmasynda qyzmet etti. 2017 jyly 7 aıdaı Qazaqstan fýtbol federasıasynyń vıse-prezıdenti qyzmetin atqardy. 

Aısultan Rahat 2013 jyly "QazRomGaz" AQ basshysy, almatylyq "Qaırat" fýtbol klýbynyń qojaıyny Qaırat Boranbaevtyń qyzy Alıma Boranbaevǵa úılendi. 2016 jyldyń jazynda olardyń Amelı esimdi qyz dúnıege keldi.