Tirkelmegen Qazaqstan demokratıalyq partıasynyń Almatyda 22 aqpanda ótedi dep josparlanǵan quryltaıshylar jınalysyna barýǵa jınalǵan atyraýlyq saıası belsendilerdi kesheli beri tutqyndaý jáne ustaý bastaldy, dep jazady Qamshy.kz aqparat agenttigi azh.kz saıtynyń deregin negizge alyp. 

17 aqpanda Atyraý ákimshilik sotynyń qaýlysymen 49 jastaǵy Qasym Qojantaev «sot sheshimin oryndamaý» aıybymen 5 táýlikke qamaldy. Ol Almatyǵa 18 aqpanǵa bılet alyp qoıǵan. Polısıa boljamy boıynsha, Qojantaev termınal arqyly 75 myń teńge kóleminde nesıe alǵan jáne ony ádeıi tólemegen. Alaıda Qojantaevtyń ózi tek nesıe ǵana emes, sot sheshimi týraly bilmeıtin bolyp shyqty.

Sol túni polıseıler belgili azamattyq belsendi Talǵat Aıandy da 2 saǵat boıy baqylaýǵa alǵan, biraq ustamaǵan. Búgin, 18 aqpanda, ony polısıa departamentiniń jedel ókilderi pikirlesterin Almatyǵa júretin poıyzǵa shyǵaryp salyp turǵanda ustap aldy. Polıseıler ony polısıa departamenti ǵımaratyna alyp keldi, biraq ol óziniń advokatynsyz ishke kirýden bas tartty.  

– Búgin men shyǵaryp salǵan birneshe adamdy «Atyraý – Almaty» poıyzyna jibermegen. Men eshqandaı shaqyrtý qaǵazyn alǵanynym joq. Men jaı ǵana ózimniń dostarym men tanystarymdy temirjol vokzalynda jolǵa shyǵaryp saldym. Sol jerde meni ustady. Onyń sebebin túsindirgen de joq. Meniń advokatym qazir sotta otyr, al men advokatsyz jaýap bermeımin, –  dedi ol.

Búgin óz úıiniń janynda «Atyraý – Almaty» poıyzyna  otyrý úshin vokzalǵa barmaq bolǵan Dará Oljaǵalıev ustaldy. Ony polısıa departamentine alyp keldi, tergeýshi Aqylbek Taıshıev odan eki saǵat boıy jaýap alǵan.

– Meniń mártebem – tergeýshi. Olar QR QK 400 baby (Jınalystardy, mıtıńilerdi, pıketterdi, kóshe sherýleri jáne demonstrasıalardy uıymdastyrý men ótkizý tártibin buzý) boıynsha qylmystyq is qozǵaǵan sıaqty. Jaqynda biz Maks Boqaevty bosatý úshin 1 naýryzda mıtıńige shyǵýǵa adamdardy shaqyrǵan beınejazba túsirgen bolatynbyz. Degenmen, polısıa degenine jetti, men poıyzǵa úlgermeı qaldym, – deıdi D. Oljaǵalıeva.  

17 aqpanda belsendi Altyngúl Ishımova polısıa departamentine jaýap alýǵa shaqyrtý aldy. Ol buǵan deıin «Saıası tutqyn Maks Boqaevty bosatýdy talap etemiz!» degen uranmen beıbit mıtıń ótkizýge ótinish jazǵan edi. Ol Almaty poıyzyna otyrǵanymen polıseıler ony Maqat stansıasynda poıyzdan túsirip aldy. Qazirgi ýaqytta Ishımovanyń qaıda júrgeni belgisiz.

Budan basqa Almatyǵa júrýge tıisti Rústem Qajymov jáne Jaras Mýsın de ustaldy. Qazir olardy jaýap alý úshin polısıa departamentine alyp ketti.

– Jaýap alyp bolǵan soń olardyń barlyǵy da bosatylady, – dep habarlady Atyraý oblysy polısıa departamentiniń baspasóz qyzmeti.

Sońǵy kúnderi Qazaqstanda túrli aıyptaýlarmen 30-dan asa belsendiniń ustalǵanyn aıta ketý kerek. Polısıa departamenti ǵımaratynyń mańynda jańa ǵana atyraýlyq quqyq qorǵaýshy Ásel Nurǵazıeva ustaldy.