Dempartıa qurý boıynsha yntaly top jetekshisi, opozısıalyq saıasatker Janbolat Mamaı "ruhsat etilmegen mıtıńige shaqyrdy" degen aıyppen úsh táýlikke qamaldy.

Qoǵam belsendisinyń zaıyby, jýrnalıs Inga Imanbaıdyń facebook paraqshasyna jazýynsha, Almaty oblysy Qarasaı aýdandyq mamandandyrylǵan ákimshilik sottyń bul sheshimi 22 aqpanda tańǵy saǵat 5-te aıtylǵan. Oǵan deıin Janbolat Mamaıǵa eshkimdi kirgizbegen. Quqyqqorǵaýshy Janar Balǵabaev da opozısıalyq saıasatkerdiń 50-ge jýyq jaqtasymen birge aýdandyq ishki ister bólimi ǵımaratynyń aldynda kire almaı turǵan.

Polısıa keshe yntaly top múshesi Janbol Rahmatýllany ustaǵan. Mamaı men onyń jaqtastary Rahmatýlannyń soty ótetin Qarasaı aýdandyq sotyna barǵanda Mamaıdyń ózi ustalǵan.

Artynsha Dempartıa qurý boıynsha yntaly top jaqtastary Almaty oblysy Qarasaı aýdandyq ishki ister bólimi ǵımaratynyń aldyna jınala bastady. Olar Janbolat Mamaıdy bosatýdy talap etip, 10 shaqty azamat tótenshe shara retinde ashtyq jarıalady.

Búgin Demokratıalyq partıa bastamashyl toby músheleriniń biri Saılaý Lepesovtyń qamalǵany týraly aqparat shyqty.

19 aqpanda Mamaı bastaǵan "Dempartıa" yntaly tobynyń ókilderi 22 aqpanǵa josparlanǵan quryltaı sıez ótpeıtinin, onyń ornyna sol kúni mıtıńige shyǵatynyn aıtqan. Al 20 aqpanda Janbolat Mamaı azamattardy 22 aqpan kúni Almatydaǵy "Astana" alańyna mıtıńige kelýge shaqyrǵan bolatyn.

Yntaly top jetekshisiniń jaqtastary áleýmettik jelilerde búgin mıtıńi bolatynyn, "Janbolat Mamaıdy bosatýyn talap etetinderin" habarlaýda.