22 aqpan kúni tústen keıin Almatydaǵy "Astana" alańynynyń mańynda Fransıada turatyn qýǵyndaǵy eks-bankır Muhtar Áblázov jetekshilik etetin "Qazaqstannyń demokratıalyq tańdaýy" (QDT) uıymynyń mıtıńisine kelgender ákimdik ókilderiniń tarańyzdar degen talabyn elemedi. Taramaǵandardy polısıa birtindep ustap, arnaıy kólikterge kúshtep tıedi.

Oqıǵa ornynda júrgen Qamshy tilshisiniń habarlaýynsha, polısıa azamattardy "mıtıńi ótedi" degen "Astana" alańyna jetkizbeı, avtozaktarǵa salyp áketip jatyr. Polısıa ustaǵan narazylardyń keıbiri "Oıan, Qazaqstan!", "Shal ket!" dep aıqaılaǵan.

"Mıtıńi ótedi" degen alań túgeldeı polısıa men arnaıy jasaqtyń baqylaýynda. Arnaıy jasaq ókilderi arasynda áıelder jasaǵy da júr.

Alań aýmaǵynda ınternet múldem istemeı tur.

Túske deıin dál osy "Astana" alańynda "Qazaqstan bıligine opozısıamyz" dep júrgen taǵy bir uıym – "Demokratıalyq partıa" belsendileri de mıtıńi ótkizbekshi boldy. Olardyń bir shoǵyryn tańǵy saǵat 9.30-da alańǵa jetkizbeı polısıa ustap alyp ketti.

Al osy uıymnyń on shaqty belsendisi "Astana" alańyna jetip, sol mańdaǵy Álıa men Mánshúk eskertkishiniń aldynda bılikke óz talaptaryn aıtty. Olar keshe Qaskeleń qalasynda ustalyp, "mıtıńige shaqyrdy" degen aıyppen úsh táýlikke qamalǵan "Dempartıa" bastamashyl tobynyń jetekshisi "Janbolat Mamaı men basqa da ustalǵan belsendilerdi bosatsyn" degen talap qoıdy. Olarǵa ákimdik qyzmetkerleri men prokýratýra ókilderi eskertý jasap, taraýǵa shaqyrdy. Sodan keıin polısıa belsendilerdiń barlyǵyn ustap áketti. Ustalǵandardyń arasynda saıasatker Tólgen Júkeev pen Janbolat Mamaıdyń áıeli, "Jas Alash" gazetiniń bas redaktory Inga Imanbaı da bar. Biraq túskiten keıin Imanbaı Facebook paraqshasynda post jazyp, polısıa ózin  bosatqanyn habarlady. 

Buǵan deıin QDT qozǵalysynyń jetekshisi Muhtar Áblázov ta, "Dempartıa" bastamashyl tobynyń jetekshisi Janbolat Mamaı da óz jaqtastaryn 22 aqpan kúni "Astana" alańyna mıtıńige shaqyrǵan bolatyn. Qazaqstannyń bas prokýratýrasy 21 aqpanda Áblázovty "alaıaq, adam óltirýshi" dep qaralap, el azamattaryna ol shaqyrǵan jıynǵa barmaýǵa keńes bergen bolatyn. 

Azamattardy bir kúnge, bir jerge mıtıńige shaqyrǵanymen Mamaı men Áblázov sońǵy kezderi bir-birin jıi synap júr. Uıymy Qazaqstanda "ekstrımıstik" dep tanylǵan Áblázov Mamaıdy "bıliktiń jobasy" dep esepteıdi, al Mamaı ózi quraıyn dep júrgen "Demokratıalyq partıany" naǵyz "opozısıalyq uıym" bolady dep aıtady.