Koreıa Respýblıkasynda koronavırýsqa shaldyqqandar sany 334 adamǵa artyp, 1595-ke jetti. 12 adam qaıtys boldy. Bul týraly Koreıa densaýlyq saqtaý mınıstrligine qarasty syrqatty baqylaý men profılaktıka ortalyǵy habarlady, dep jazady TASS.
Ońtústik Koreıa koronavırýs juqtyrǵandar sany boıynsha álemdegi ekinshi memleketke aınalyp otyr. Sońǵy táýlikte vırýsqa shaldyqqandar sany Qytaıdaǵy jeltoqsanda tirkelgen kórsetkishke jýyqtaǵan.
Qytaıda ótken táýlikte 433 adamnyń vırýsty juqtyryp, 29 adamnyń kóz jumǵany belgili boldy.
Koronavırýs epıdemıasy shyqqaly 2744 adam ajal qushyp, 78,4 myń adam vırýsty juqtyrǵan. 32,4 myń adam aýrýdan tolyq emdelgen.
Sońǵy kúnderi koronavırýstyń taralý aımaǵy keńeıe túsken. Taıaýda Grýzıa syrqattyń alǵashqy jaǵdaıy tirkelgenin habarlady. Grýzıa densaýlyq saqtaý mınıstri Ekaterına Tıkaradze Irannan Ázerbaıjan arqyly el aýmaǵyna ótken azamattan vırýstyń anyqtalǵanyn málim etti.
Sondaı-aq Pákistanda syrqattyń eki jaǵdaıy anyqtalǵan. Vırýsty juqtyrǵan eki azamat ta jýyrda Iranda bolyp qaıtypty.
Sonymen qatar koronavırýs Brazılıa, Norvegıa, Rýmynıa, Grekıa, jáne Soltústik Makedonıada tirkelgen.
Búginde atalǵan vırýs ınveksıasy 48 elde anyqtalyp otyr. Dúnıejúzilik densaýlyq saqtaý uıymy Ońtústik Koreıa, Italıa jáne Iran elderi sıaqty aýrý oshaqtaryndaǵy jaǵdaılarǵa qatty alańdaýly.
Pikir qaldyrý