Jetisaı aýdanynda Baýyrjan Baıbek Abaı aýylynyń turǵyndarymen júzdesip, olar úshin asa ózekti bolyp otyrǵan egis alqaptaryn sýarý máselesiniń mán-jaıyna qanyqty. Munda birneshe jyldan beri 2600-den astam sharýa qojalyqtary paıdalanatyn K-30 sýarý kanalyn qaıta qalpyna keltirý aıaqtalmaı keledi.
«Turǵyndar aıtqandaı, kanaldy betondaý jumystary merziminen keshiktirilip, kóbinese sapasyz júrgiziledi. Atalǵan másele, ortalyq, jáne jergilikti atqarýshy organdar jumysyn úılestirýdi qajet etedi. Sharýa qojalyqtarynyń basshylarymen birge maqta ındýstrıasyn damytýǵa memlekettik qarjylaı kómek kórsetý máselesin de kóterdik. Bul máselelerdi elordada partıalyq alańda partıa músheleri – aýyl sharýashylyǵy jáne tabıǵı resýrstar mınıstrleriniń qatysýymen egjeı-tegjeıli talqylaýdy josparlap otyrmyz. Qorytyndysyn turǵyndarǵa qosymsha habarlaımyz», – dep jazdy Baýyrjan Baıbek óziniń Instagram paraqshasynda.
Budan keıin partıa tóraǵasynyń Birinshi orynbasary Otyrar aýdanynyń Sháýildir aýylyna at basyn tiredi. Munda buryn 300-den astam otbasy jylý máselesine baılanysty «Nur Otan»-ǵa habarlasqan bolatyn.
«Elbasynyń bastamasymen qolǵa alynǵan «Aýyl – El besigi» jobasynyń aıasynda búginde elimizdiń shalǵaı aýdandarynyń túıitkildi máselelerin sheshý boıynsha partıa júıeli sharalar ázirleýde. Oblys ákiminiń aıtýynsha, jaqyn arada búdjetti naqtylaý kezinde jylý júıelerin salý úshin 700 mln. teńgeden astam qarjy bólinedi. Qazandyqtyń qurylysyna qarajat bólingen. Aýyl turǵyndary kótergen máseleni sheshý «Nur Otan» partıasynyń baqylaýyna alyndy», – dep atap ótti Baýyrjan Baıbek.
Túrkistan oblysyna jumys sapary barysynda bıleýshi partıa basshylyǵy Jetisaı qalasyndaǵy 1964 jyly salynǵan apatty jaǵdaıdaǵy emhananyń ornyna jańadan boı kótergen qalalyq emhananyń ǵımaratymen tanysty. Tıisti medısınalyq jabdyqtardyń tolyq jetkizilmeýinen bul nysan birneshe aıdan beri paıdalanýǵa berilmeı keledi. Jergilikti bılik bul máseleni taıaý arada sheshemiz dep sóz berdi.
Sol kúni Baýyrjan Baıbek Qazybek aýylyna da baryp, oblystaǵy izgi júrekti kásipkerlerdiń kómegimen baspanaǵa qol jetkizgen otbasylarmen kezdesti.
«Baqytty otbasy» partıalyq jobasynyń aıasynda oblysta qıyn jaǵdaıǵa tap bolǵan otbasylarǵa qoldaý kórsetýge baǵyttalǵan «Qamqorlyq» qaıyrymdylyq baǵdarlamasy tabysty júzege asyrylýda. 
«Jetisaı aýdanynda áleýmettik qoldaýdy qajet etetin 141 otbasy tirkelgen. Óńir basshylyǵynyń bastamasymen olardyń árbirine «Nur Otan»-nyń músheleri men jaqtastary arasynan kýratorlar bekitildi. 86 otbasyǵa materıaldyq kómek kórsetildi. Demeýshilik qarajattyń esebinen 10 muqtaj otbasyǵa úı salynyp jatyr.
Meniń oıymsha, bul – dańqty babamyz, uly fılosof, oıshyl ál-Farabı tujyrymdaǵan izgi jáne qaıyrymdy qoǵamnyń naqty mysaly. Yntymaqtastyq, ádildik, ózara senim jáne jaýapkershilik, álsizderdi qýatty, jaǵdaıy joqty aýqatty adamdardyń qoldaýy – «Nur Otan» partıasy ustanatyn ózgermes basty qundylyqtar», – dep atap ótti Baýyrjan Baıbek. 
Eske sala keteıik, Elbasy tapsyrmasy boıynsha «Nur Otan» partıasy birneshe aıdan beri Úkimetpen jáne óńirlik fılıaldarmen birlese otyryp, aldaǵy 5 jylǵa aýdandardy, qalalardy jáne oblystardy damytýdyń jańa baǵdarlamasyn ázirlep jatyr. Atalǵan baǵdarlamalarda árbir jekelegen óńirdiń jergilikti erekshelikteri eskerilip, azamattardyń naqty qajettilikteri kórinis tabatyn bolady. Osy jumystardyń aıasynda «Nur Otan» partıasynyń basshylyǵy elimizdiń barlyq óńirin, tipti shalǵaı eldi mekenderin de aralap shyǵady. Búgingi sharalar aıaqtalǵan soń Baýyrjan Baıbek birden Qyzylorda oblysyna jumys saparymen jol tartty.
Pikir qaldyrý