Quqyq qorǵaýshylar Ulybrıtanıa úkimetin Qytaıdyń Shyńjań provınsıasynan keletin maqta ımportyna tyıym salýǵa shaqyrdy. Olardyń aıtýynsha, Shyńjańda  uıǵyr, qazaq musylmandary májbúrli túrde jumys isteıtin zaýyttar ornalasqan. Bul týraly The Independent jazdy. 

Sársenbide HMRC-ge (Ulybrıtanıa kirister men shyǵystar departamenti) zańgerler men quqyq qorǵaýshylar daıyndaǵan 60 betten turatyn qujat usynyldy. Avtorlar qujatta "Shyńjańdaǵy májbúrli eńbek rejıminiń aýqymy men aýyrlyǵyna qatysty úlken jáne senimdi dálelder" bar ekenin aıtty.

Ótken jyly H&M, Ikea, Muji jáne Uniqlo sıaqty brıtandyq tanymal brendter Shyńjań maqtasyn óz ónimderinde paıdalanǵan. Keıbir kompanıalar muny ashyq aıtqan. Uniqlo óziniń jeıdelerinde qoldanylatyn Shyńjań maqtasyn "joǵary sapasymen tanymal" dep maqtaǵan.

BUU Shyńjańda musylman azshylyqtaryna qarsy júıeli túrde adam quqyqtaryn buzýshylyq bolyp jatyr dep sanaıdy. 2017 jyldan bastap Qytaıda mıllıonnan astam adam qamaldy degen málimet bar. Keıbir málimetter boıynsha bul kórsetkish úsh mıllıondy quraıdy. Alaıda Beıjiń bulardy "kásiptik oqý ortalyqtary" dep ataıdy.

Qytaı úkimeti "bul ortalyqtar erikti jáne bul eldiń soltústik-batysynda ıslamshyl búlikshilerdiń kúshin joıý úshin qajetti qadam" dep sendiredi. Biraq quqyq qorǵaýshylar "mundaı ortalyqtardy "oqyp bitirgender" ortalyq úkimet sqemasy boıynsha zaýyttarǵa aýysady, jergilikti jataqhanalarda táýlik boıǵy baqylaýda turady jáne óz úılerine oralýǵa ruqsat berilmeıdi" deıdi.

Maqta – Qytaı úshin úlken bıznes. Strategıalyq jáne halyqaralyq zertteýler ortalyǵynyń esebine sáıkes, Qytaı búkil álemdik maqta jetkizilimderdiń 20-25 paıyz mólsherin qamtamasyz etedi. Onyń 84 paıyzy Shyńjańnan keledi.