"Ońtústik Qytaı teńizindegi shıeleniske baılanysty jaqynda Qytaı men AQSH arasynda soǵys bastalýy múmkin" dep málimdedi BBC. Bul týraly Qamshy tilshisi habarlaıdy.

BBC-dyń Qytaı jónindegi sarapshy-jýrnalısti Chaoıın Fennyń aıtýynsha, eki derjava arasyndaǵy shıelenis qazir "semserdiń júzindeı" ótkir bolyp tur. Sońǵy kezderi Gonkong pen Huawei kompanıasy máselesine baılanysty AQSH pen Qytaı arasyndaǵy qaıshylyq kúsheıe tústi, biraq sarapshy BBC-ge Ońtústik Qytaı teńizi áskerı qaqtyǵystardyń eń yqtımal aımaǵy ekenin aıtty. Osy aptada AQSH memlekettik hatshysy Maık Pompeo Pekınniń Ońtústik Qytaı teńizindegi "qorlaýyna" qatysty Vashıngton qatań ustanymda bolatynyn jarıalaǵannan keıin Qytaı AQSH-ty "shıelenisti qozdyrdy" dep aıyptaǵan.

– Pekınniń (qaıtarma) nusqalarynyń biri – sanksıalar salý nemese AQSH kompanıalaryn qara tizimge engizý... Alaıda Apple jáne Microsoft sıaqty AQSH kompanıalary qytaılyqtardyń kúndelikti ómirine tereń enip ketkeni problema bolyp otyr, sondyqtan bul qadam Qytaıǵa da zıan tıgizedi, – deıdi Chaoıın Fen.

Jýrnalısiń oıynsha, Pekınniń basqa tásildermen kek qaıtarýy Batysqa qaýip tóndirýi múmkin. Onyń pikirinshe, AQSH-tyń Ońtústik Qytaı teńizindegi is-qımyldary Qytaıdy qulatý áreketi retinde qarastyrylady.

Pekın daýly aımaqtar úshin talasta qatań reaksıaǵa barýy yqtımal.

– Eki eldiń saýda nemese Gonkong týraly qaıshylyqtary bar, biraq Ońtústik Qytaı teńizi máselesinde eki derjava soǵysqa barýy múmkin, – deıdi sarapshy.

BBC-diń Vashıngtondaǵy korespondenti Garı O'Donogý da sarapshynyń pikirine kelisetinin jetkizip, eki eldiń qarym-qatynasy "baqylaýdan shyǵyp" ketkeni aıtylǵan.

Buǵan deıin Ońtústik Qytaı teńizinde AQSH pen Qytaı áskerı kúshteri bir ýaqytta jattyǵý ótkizip jatqany habarlanǵan. Qytaı shildeniń basynda Parakel araldary mańyna soǵys kemelerin jibergen. Keıinirek, Vashıngton da Parakel araldary mańyna áskerı ushaqtar tasymaldaýshylaryn jiberdi. Amerıka oǵan qosa, ıadrolyq bomlalaýshysyn da jóneltken. Aımaqta AQSH jáne japon kemeleri birge áreket etýde.

Al qytaılyq Global Taıms basylymy Beıjińniń "kıller zymyrandary" AQSH soǵys ushaqtaryn tasymaldaýshylarǵa soqqy beretinin eskertken. 

Keıinirek, Ońtústik Qytaı teńizindegi AQSH-Japonıa birikken áskerı kúshterine qoldaý kórsetý úshin Ulybrıtanıanyń soǵys ushaqtaryn tasmaldaýshy kemeleri men joıǵyshtarynyń jiberiletini habarlanǵan.

Áskerı sarapshylar eki eldiń kóptegen joıǵyshtary men kemeleriniń óte jaqyn qashyqtyqta jattyǵý ótkizýi áskerı qaqtyǵys qaýpin kúsheıtetinin málimdegen. 

AQSH Áskerı-teńiz kúshteri "USS Nimitz" jáne "USS Ronald Reygan" soǵys ushaqtaryn tasymaldaýshy kemeleri 4 jáne 6 shilde aralyǵynda daýly sý jolynda operasıalar jasap jáne áskerı jattyǵýlar ótkizip, 17 shilde aımaqqa oralǵanyn habarlady.

Keıinirek, jerserikten túsirilgen sýretter Beıjińniń Ońtústik Qytaı teńizindegi daýly araldarǵa tórt joıǵysh ushaǵyn jibergenin kórsetken.