«Shuǵyla» qory «Ómir syıla» aksıasy boıynsha jasaǵan jumystary jaıly qorytyndylady. Bul shara Nur-Sultan qalasynda úkimet úıinde ótti. Oǵan QR premer-mınıstriniń orynbasary Eraly Luqpanuly Toǵjanov jáne QR densaýlyq saqtaý mınıstri Alekseı Vladımırovıch Soı qatysty.

Basshylyq atqarylǵan isterge joǵary baǵa berip, qorǵa alǵys bildirdi. Alǵa qoıyp otyrǵan josparlar týraly sóz boldy. Qordyń quryltaıshysy Meıirhan Abdrahmanov, qamqorlyq keńestiń múshesi Azat Tapıshev jáne Syrymbek Taý, «Shuǵyla» qorynyń prezıdenti Sársenbek Imanbaev bastaǵan azamattar óz kezeginde mınıstrlik tizginin ustaǵan basshylarǵa der kezinde bergen kómegi úshin rahmet aıtty.

Aıta keteıik, «Ómir syıla» aksıasy bastalǵanda «Shuǵyla» Qory jınaǵan 450 mıllıon qarjyǵa Qytaıdan Qazaqstanǵa 4000 ottegi konsentratoryn jetkizý máselesi týyndaǵan bolatyn. Sol kezde mınıstrlik tórt ushaq reısin uıymdastyryp, kedendik salyqtardan bosatyp, túrli tekserýlerdi azaıtyp, isti jeńildetti. Sıan qalasynan tikeleı Atyraýǵa, sosyn Shymkent qalasyna ushaqtyń qonyp, júk túsirýine járdemdesti. Nátıjesinde barlyq qurylǵylar Qazaqstannyń barlyq núktesine ádiletti túrde bólinip, jetkizildi.

Bul isti jalǵyz adam jasaı almas edi. Bári birigip, jumylyp judyryq bolyp, isti sońyna deıin jetkizdi. Stýdentterden bastap, mınıstrge deıin aralasty. Halyq pen bıliktiń arasy qashyq deımiz. Biraq osy joly bılik basyndaǵy azamattar úlgi kórsetip, qýantty. Sharýany tez yńǵaılaıtyn, nıeti túzý jandardyń basshylyqta otyrǵanyna shúkir deısiń. Eraly myrzanyń kómekshisi Nursultan, Soı myrzanyń kómekshisi Batyr baýyrlarymyzdyń jaýapkershilikpen jumys jasaıtynyna kýá boldyq.

Elimiz aýrýdan aıyǵyp, salaýatty ómir saltyn ustanǵan halyq bolsyn. Bir janymyz qaldy. Endi ary qaraı maǵynaly ǵumyr kesheıik.