Onyń aıtýynsha, tirkelgen úmitkerlerdiń 35,8 paıyzy (174-i)  - áıelder, 29 paıyzy (141) – 35 jasqa deıingi jastar. Bastaýysh partıa uıymdarynan 221 azamat usynylsa, ózin-ózi usynýshylar – 265 adam. Praımerızge qatysýǵa Aqtóbe qalasy, Muǵaljar, Hromtaý, Shalqar, Alǵa aýdandary erekshe belsendilik tanytqan.

Erbol Danaǵulov aqtóbelikterdi aldaǵy ýaqytta atqarylatyn jumystarmen tanystyryp, josparlarymen bólisti. Úmitkerler 31 tamyzdan 6 qyrkúıekke deıin úgit-nasıhat naýqanyna daıyndalyp, 7 qyrkúıekten bastap úgit júrgizýge kirisedi. Onyń ishinde  25 jerde jarıa pikirsaıystar ótkizý qarastyrylǵan. Oǵan qatysý barlyq úmitkerlerge mindetti.

-Úmitkerler birinshi kezeńde naqty eldi mekenderdiń máselelerin sheshý boıynsha óz kózqarasyn tanystyrady. Iaǵnı jergilikti jerlerdegi ózekti máselelerdi ashyq kóterip, naqty sheshimder usynýy tıis.  Ekinshi kezeńde «suraq-jaýap» formatynda pikirsaıys sesıasy ótedi. Pikirsaıystardyń jalpy uzaqtyǵy 90 mınýttan aspaıdy, -dep Erbol Danaǵulov jarıa pikirsaıystardy ótkizý tártibin aıtyp ótti.

Partıaishilik saılaýda adamdardyń qaýipsizdigi basty orynǵa qoıylǵan. Úmitkerlerdiń jarıa pikirsaıystary, partıa múshelerimen kezdesýleri  kem degende 2 metr araqashyqtyqty saqtaı otyryp ótedi. Sondaı-aq kezdesýlerdi kóbine ashyq alańda, al pikirsaıystardy onlaın formatta uıymdastyrý qarastyrylǵan.

1-3 qazan aralyǵynda oblystaǵy 33 myńnan astam partıa múshesiniń daýys berýi úshin 136 daýys berý ýchaskeleri belgilenipti. Onyń ınternet baılanysyna qosylmaǵan 42 ýchastokta  dástúrli búletenmen,  94 ýchastokta onlaın  daýys  berý  josparlanyp  otyr.

- Búginnen bastap úmitkerlermen kezdesý uıymdastyryp, úgit-nasıhat jumystary týraly jan-jaqty aqparat berýdi bastadyq. Úmitkerlerimiz shetinen bilimdi, belsendi, óz kúshine senimdi. Bastysy elimizdiń damýyna múddeli. Biz olarǵa teń múmkindik berip, adal, ashyq túrde baq synaýlaryna bar jaǵdaıdy jasaımyz, - dedi Erbol Danaǵulov.

Aıta ketý kerek, partıaishilik saılaýǵa elimiz  boıynsha 10 990 adam tirkeldi.