Búgin Aqtóbe oblysynyń ákimi Ońdasyn Orazalın óńirdegi juqpaly aýrýlardyń, onyń ishinde COVID-19 koronavırýstyq ınfeksıasynyń órshýine qarsy turýǵa daıyndyq deńgeıin joǵarylatý maqsatynda oblystaǵy 19 medısınalyq mekemege jedel járdem kóliginiń kiltin tabystady. Sońǵy úlgidegi qural-jabdyqtarmen qamtamasyz etilgen jedel járdem kólikteri Aqtóbe qalalyq #1,2,3,4, emhanalary men Qobda, Alǵa, Muǵaljar, Yrǵyz, Baıǵanın, Hromtaý, Oıyl, Shalqar, Embi, Temir aýdandyq aýrýhanalaryna berildi. 

Aımaq basshysy sapaly densaýlyq saqtaý el ál-aýqatynyń negizgi kórsetkishteriniń biri ekenin jetkize otyryp, jergilikti aq halattylarǵa alǵys bildirdi.
“Halyqqa shuǵyl medısınalyq kómek kórsetýdiń negizgi baǵyttarynyń biri - jedel medısınalyq kómek. Naýqastardyń ómirin arashalaýǵa alǵash bolyp jedel- járdem brıgadasy keledi, al naýqastardyń taǵdyry dárigerlerdiń áreketterine, jabdyqqa, sonyń ishinde kólikke baılanysty. Pandemıa kezinde azamattarǵa aıanbaı kómek kórsetkenderińiz úshin alǵys bildiremin”,- dedi Ońdasyn Orazalın. 10 myń halqy bar eldimekende 1 jedel járdem kóliktiń bolýy mindetti dep kórsetilgen Densaýlyq saqtaý mınıstrligi bekitken standartqa sáıkes Aqtóbe oblysynda bul sharalar belsendi júzege asyrylyp otyr. Jyl basynan beri 22 jedel- járdem kóligi satyp alynsa, qazan aıynyń sońyna deıin taǵy da 22 medesınalyq kólik alynady.Nátıjesinde, aımaqtaǵy jańa jedel-járdem kólikteriniń sany 63- ti quraıdy. Tabystalǵan 19 kóliktiń ishi qajetti medısınalyq jabdyqtarmen tolyq qamtamasyz etilgen. Onda ókpege jasandy aýa berý apparatynan bastap defıbrıllátor, elektrokardıograf, monıtor, elektrootsos jabdyqtary ornatylǵan.