Ázerbaıjan Respýblıkasynyń Qazaqstandaǵy elshiligi Ázerbaıjan men Armenıa syrtqy ister mınıstrleriniń Máskeýde ótken kezdesýi nátıjesinde qol jetkizilgen 2020 jyldyń 10 qazan kúni saǵat 12:00-den bastap atysty gýmanıtarlyq maqsatta toqtatý rejımin ustaný kelisimine qaramastan, Armenıanyń qarýly kúshteri kelisimdi óreskel túrde buzýdy jalǵastyryp jatqanyn habarlady.

Elshilik taratqan málimetke saı, atysty gýmanıtarlyq maqsatta toqtatý rejımi kúshine ene salysymen, Ázerbaıjannyń Agdam jáne Terter aýdandary Armenıa qarýly kúshteri tarapynan zeńbirek oǵyna ushyraǵan. Arada birneshe saǵat ótken soń Armenıanyń qarýly jasaqtary Gadrýt jáne Jábraıl baǵytynda shabýyl áreketin jasaǵan.

"Armenıa qarýly kúshteriniń Sýgovshan aýmaǵynda armán soldattarynyń máıitin jınap júrgen aq tý tigilgen sanıtar mashınasyn atqylaýy nátıjesinde bir medısınalyq qyzmetker aýyr jaraqat aldy.

11 qazan túni maıdan shebinen alys ornalasqan, kólemi boıynsha Ázerbaıjannyń ekinshi úlken qalasy Gánjaǵa Armenıa qarýly kúshteri raketalyq shabýyl jasady. Shabýyl nátıjesinde 7 adam qaza taýyp, 34 adam jaraqat aldy, aralarynda balalar da bar.

Atysty gýmanıtarlyq maqsatta toqtatý týraly kelisimnen keıin Armenıa qarýly kúshteriniń beıbit turǵyndar men qalalarǵa oq jaýdyrýy varvarlyqtyń ta aıqyn mysaly bolyp tabylady, al Armenıa basshylyǵynyń atysty toqtatýǵa shaqyrýy ekijúzdiliginiń aıǵaǵy" delingen aqparattyq habarlamada.

Elshilik Armenıanyń beıbit turǵyndarǵa, úılerge, azamattyq obektilerge jáne medısınalyq qyzmetkerlerge Ázerbaıjanǵa qarsy agresıa saıasaty sheńberinde qasaqana oq jaýdyrýy – eldiń halyqaralyq gýmanıtarlyq quqyq jáne Jeneva konvensıalarymen birge halyqaralyq quqyqtyń negizin qalaýshy normalardy elemeıtinin, óz mindetterin sózsiz buzatynyn jáne gýmanızmniń negizgi qaǵıdattarynan múldem alys ekenin taǵy bir márte kórsetetinin atap ótti.

"Armenıa tarapynan jasalǵan agresıa aktilerin qatań túrde aıyptaımyz jáne halyqaralyq qoǵamdastyqty basqynshy el Armenıany halyqaralyq quqyq pen halyqaralyq mindetterdi ustanýyna májbúrleý maqsatynda batyl qadamdar jasaýǵa shaqyramyz.

Aýmaqtaǵy ahýal jaýapkershiligi Armenıanyń áskerı-saıası basshylyǵynyń moınynda" dep habarlady Ázerbaıjannyń Qazaqstandaǵy elshiligi.