Ortalyq komýnıkasıalar qyzmetinde ótken baspasóz konferensıasynda Aqtóbe oblysynyń ákimi Ońdasyn Orazalın óńirdiń áleýmettik-ekonomıkalyq damýy, sondaı-aq óńirde iske asyrylyp jatqan jańa joǵary tehnologıalyq ınvestısıalyq jobalar týraly baıandady.

Spıkerdiń aıtýynsha, óńirde pandemıa men shekteý sharalaryna qaramastan barlyq negizgi áleýmettik-ekonomıkalyq kórsetkishterdiń qarqyndy ósýi qamtamasyz etilgen. Ónerkásip kólemi 100,1%, ınvestısıalar – 108,8%, aýyl sharýashylyǵy – 104,1%, qurylys – 116,4%, turǵyn úıdi paıdalanýǵa berý - 103,6% qurady.

9 aıdyń qorytyndysy boıynsha oblys ekonomıkasyna 410 mlrd.teńge ınvestısıa tartyldy.

«Bıyl óńirde 1 200 jumys ornyn ashatyn, quny 140,2 mlrd. teńge bolatyn 26 iri ınvestısıalyq joba júzege asyrylýda. 54,5 mlrd. teńgege 7 joba endigi paıdalanýǵa berilip, 330 jumys orny quryldy.

İri jobalardyń qatarynda «ARM wind» JSHS-niń «Badamsha-1» jel elektr stansasynyń, «Kóktas Aqtóbe» AQ-nyń qurylys materıaldary men sılıkat kirpish óndiretin zaýytynyń, «Alina Holding» JSHS-niń qatty-untaq toltyrǵysh shyǵaratyn sehynyń, konteıner (bıg-beg), vagonnyń ishine salýǵa arnalǵan arnaıy matalar men japqyshtar shyǵaratyn pishý sehynyń, «Geba» JSHS-niń muzdatylǵan jartylaı fabrıkattar shyǵaratyn zaýytynyń, «Milker» JSHS-niń qurama jem zaýytynyń qurylystary bar. Investısıa tartý jumystary 2021 jyly da jalǵasatyn bolady. Sonyń ishinde 149,3 mlrd. teńgege 18 joba júzege asyrylyp, 2 200-den astam jumys orny qurylady»,- dedi Ońdasyn Orazalın.

Qarǵaly aýdanynda quny 38 mlrd.tg. bolatyn jel elektr stansasynyń ekinshi kezegin, 15 mlrd. teńge somaǵa quramynda zıandy munaıly qaldyqtardy qaıta óńdeıtin zaýyt, quny 3,7 mlrd teńge bolatyn mobıldi burǵylaý qurylǵylaryn shyǵaratyn kásiporyn, 2 mlrd. teńgege metal qańqasyn shyǵaratyn zaýyt salý jobasyn júzege asyrý josparlanǵan.

Ońdasyn Orazalın pandemıa kezinde shaǵyn jáne orta bıznes eń kóp zardap shekkenin, soǵan baılanysty óńirde osy salany qoldaý jáne odan ári damytý máselelerine erekshe kóńil bólinetinin atap ótti.

Memlekettik qoldaýdyń qoldanystaǵy tetikterin 1 300-den astam SHOB jobasy paıdalandy, bul 2019 jyldyń sáıkes kezeńimen salystyrǵanda 21%-ǵa artyq. Onyń ishinde «Bıznestiń jol kartasy» aıasynda 392 SHOB jobasy qoldaý tapty, «Qarapaıym zattar ekonomıkasy» baǵdarlamasy aıasynda 100 joba, «Eńbek» baǵdarlamasy aıasynda taǵy 811 joba maquldandy.

2021 jyly osy memlekettik baǵdarlamalar aıasynda qoldaý kórsetilgen jobalardyń jalpy sanyn 1,5 myńǵa deıin arttyrý josparlanýda.