Birtanovtyń qamalǵany medısına qyzmetkerleri men jýrnalıser jáne blogerler arasynda pikir qaıshylyǵyn týdyrdy.

Aldymen 5 qarashada Qazaqstandaǵy belgili 10-nan astam dárigerdiń Birtanovty qoldap jazǵan ashyq haty jarıalandy.

Ashyq hat avtorlary Birtanov jumysty tıimdi istegen, pasıentter men áriptesterine ashyq mınıstr bolǵanyn tilge tıek etip, onyń qarapaıym sanıtardan bastap, taksıkolog dáriger, bólim meńgerýshisi, ǵylymı ortalyq pen medısınalyq holdıń jetekshisi, mınıstr qyzmetterin atqarǵanyn alǵa tartqan.

Sondaı-aq dárigerler Birtanovtaı bilikti uıymdastyrýshynyń jemqorlyq deregine qatysy baryna kúmán keltirip, onyń elge myqty mamandardy tartýdaǵy eńbegin, densaýlyq saqtaý júıesiniń damýyna qosqan úlesin, medısına qyzmetkerleri eńbekaqysyn arttyrýǵa yqpal jasaǵanyn atap ótken.

Ashyq hat avtorlary Birtanovqa qatysty tergeý ádil júrgiziletinine senim bildirip, tergeý kezinde qoldanylatyn bultartpaý sharasyn jumsartýdy surap, ony jaqyndarynan oqshaýlamaýdy ótingen.

Al 6 qarashada nevropatolog-dáriger Qaıyrǵalı Koneev Birtanovqa taǵaıyndalǵan bultartpaý sharasyn ózgerissiz qaldyrýdy talap etken onlaın-petısıany iske qosty.

Petısıa avtorynyń sózinshe, Birtanov repýtasıasyn saýyqtandyrýǵa arnalǵan áleýmettik jelidegi kampanıa "búdjet qarjysyn ysyrap qylǵany" úshin ustalǵan mınıstrdi "pandemıaǵa daıyn bolmaǵany úshin aıyptady" dep qoǵamdy adastyryp otyr. Avtor "kampanıa uıymdastyrýshylary osy arqyly memlekettik organdarǵa qysym kórsetip otyr" dep sanaıdy.

Petısıa uıymdastyrýshylary Eljan Birtanovtyń jaqtastaryna qatysty qylmystyq kodekstiń 407-baby 2 tarmaǵy boıynsha (Sotqa deıingi, jan-jaqty, tolyq jáne obektıvti tergep-tekserýge kedergi jasaý maqsatynda prokýrordyń nemese sotqa deıingi tergep-tekserýdi júzege asyratyn adamnyń qyzmetine qandaı da bolmasyn túrde aralasý) qylmystyq is qozǵaýǵa shaqyryp, sot prosesi aıaqtalǵanǵa deıin eks-mınıstrdi qamaýda ustaý sharasyn ózgertpeýdi talap etti.

Avtor sózinshe, Birtanovtyń Venada (Avstrıa) jyljymaıtyn múlki bar. "Eger bultartpaý sharasy ózgerse, ol ádil jáne obektıvti tergeýden qashyp ketýi múmkin" deıdi petısıa uıymdastyrýshylary.

Eks-mınıstrdiń kútikke ilinýine qarama-qaıshy kózqaras áleýmettik jelide de baıqaldy.

Birtanovty jaqtaýshylar onyń ashyq mınıstr bolǵanyn atap ótip, "Birtanovtyń isi" farmasevtıka lobbısteri arasyndaǵy saıası tapsyrys bolýy múmkin ekenin jazyp jatyr.

Alaıda 2019 jylǵy mamyr-tamyz aılaryndaǵy qaıtys bolǵandar men 2020 jylǵy sáıkes kezeńde ólgender arasyndaǵy 31 myń aıyrmashylyqty aıtyp,  burynǵy mınıstr jaqtastaryn synap jatqandar da bar. Sondaı-aq olar Birtanov vıse-mınıstr, mınıstr bolǵan jyldary aýrýhanalardaǵy tósek ornynyń 24 myń 960 orynǵa kemýine jol bergenin málim etti.

Eljan Birtanovtyń koronavırýs Qazaqstanǵa endi tarala bastaǵanda jasaǵan boljamdary durys bolmaı shyqqany belgili. Máselen, ol Qazaqstanda epıdemologıalyq jaǵdaı órshigen tusta, vırýs juqtyrýshylar sany 3500 adamnan aspaıdy degen. Alaıda búginde resmı derekke saı, 115 439 adamnan koronavırýs, 38 882 adamnan koronavırýs belgileri bar pnevmonıa anyqtalǵan. Resmı tizimge enbegen, PSR test tapsyrmaǵan, ózdiginen emdelgen qazaqstandyqtar qanshama...

Sondaı-aq ol koronavırýstyń órshigen tusy sáýir aıyna tuspa-tus keletinin málimdegen. Alaıda indet jaǵdaıynyń asqynýy Qazaqstanda maýsym, shilde aılarymen sáıkes keldi.