Almaty. Qamshy portaly -  Álemdik ekonomıkadaǵy shyrǵalańnyń bizdiń elimizdiń ekonomıkalyq, sol arqyly áleýmettik ahýalyna óz áserin tıgizetini anyq. Alyp elder arasyndaǵy qyrǵı-qabaq teketires, salynǵan túrli sanksıalar qyspaǵy men kórshi elder valútalaryndaǵy turaqsyzdyq Qazaqstannyń naryqtaǵy yrǵaǵyna óz yqpalyn tıgize de bastady.

Qazirgi tańda týyndaǵan dollar baǵamynyń kóterilýi men teńgeniń erkindikke jiberilýin jurtshylyq qalaı qabyldaýda?  «Egemen Qazaqstan» basylymy tilshisiniń Aqtaý qalasyndaǵy  «Pojstroıservıs» JSHS dırektory,  «Samýr» lezgın etnomádenı birlestiginiń tóraǵasy Gadjy Selımovpen suhbaty osy máseleni qozǵaıdy.

 - Gadjy Nazaralyuly, elimizde qarjylyq ahýalǵa qatysty oryn alyp otyrǵan jaǵdaıdy qalaı baǵamdaısyz?

- Sózimdi bylaı bastaıyn. Eń bastysy - elimiz tynysh, ishki birligimiz bekem. Bizde oryn alyp otyrǵan mundaı jaǵdaılar - syrtqy ortanyń áseri. Siz ben bizdi tolǵandyratyn, naqtyraq aıtsam, mazalaıtyn da osy másele. Qazaqstan - jer betindegi san myńdaǵan elderdiń biri bolǵandyqtan, olarmen naryq alańynda, ekonomıkalyq qarym-qatynasta bolatyny belgili. Sondyqtan, basqa elderde oryn alatyn jamandy-jaqsyly jaǵdaılardyń birqatary bizge úlkendi-kishili áserin tıgizip ótedi. Men dál qazirgi tańda oryn alyp otyrǵan qarjylyq ahýal men onyń áleýmettik-ekonomıkalyq bolýy yqtımal áserine osy turǵyda qaraımyn.

- Demek, ishki tynyshtyq bizdi sabyrly bolýǵa shaqyrady deısiz ǵoı.

- Iá, dúrligýdiń, abyrjýdyń qajeti shamaly. Dollar baǵa­my­nyń kóterilýi, munaı, metal baǵalarynyń tómendeýi, eks­port máselesi kókjıeginiń kúń­girttenýi, ulttyq tól valú­tamyz - teńgeniń erkindikke jibe­rilýi qazaqstandyqtardy biraz alańdatyp otyr. Ásirese, «ekpini túıe emes, taý qoparǵandaı daǵdarys oryn ala ma?» dep ses­kený bar. Qazir daǵdaryspen bet­pe-bet kelip turǵanymyz joq, sabyr eteıik. Al bola qal­ǵan jaǵdaıda, buǵan deıin de ózindik ekpini bar birqatar ekonomı­kalyq qıyndyqty kórgen kezde­rimiz boldy, demek tájirıbe bar. El tizginin qolyna alǵan azamat­tardyń utymdy jol bas­taýy, qıyn­dyqty eńserýdegi tabandy­lyǵy arqasynda odan qısaısaq ta synbaı shyqqanbyz. Bul da bir ótkinshi syn dep oılaımyn jáne is basyndaǵy azamattarǵa senim mol. Árıne, ekonomıkasy endi aıaqtan turyp, óziniń múmkindigine qaraı túrli alyp jobalardy aldyna qoıyp otyrǵan elimizge bul jaǵdaıdyń ońaı soqpasy anyq. Áıtse de biz sabyrlylyq, shydamdylyq tanytýmyz qajet.

- Siz aıtyp otyrǵan sabyr, shydamdylyqpen birge, qandaı jaǵdaıda da óndiristi turalatpaý máselesi de asa mańyzdy dep oılaımyz.

 - Álemdik ekonomıkadaǵy jaǵdaıdyń shatqaıaqtaýy saldarynan munaı, metal ónim­de­riniń sheteldik naryqtaǵy baǵasy tómendep ketti. Bular bizdiń elimizdiń syrtqa eksporttaıtyn negizgi ónimderi ǵoı. Bul jaǵdaı da el ekonomıkasyna óz áserin tıgizdi. Osy máseleler bizge áleýmettik-ekonomıkalyq turaqtylyqty saqtaý úshin shuǵyl sharalar qabyldaý qajettigin uqtyrdy. El Úkimeti men Ulttyq bank 2015 jyldyń 20 tamyzynan bastap jańa aqsha-nesıe saıasatyn iske asyrýǵa kirisý týraly sheshim qabyldady. Atalmysh sheshimnen biz ekonomıka ósimine, jańa jumys oryndarynyń qu­rylýyna, ınflásıanyń tómen­deýine qol jetkizemiz. Jeke kásipker bolǵandyqtan, bizdiń de ká­sibimizge yqpaly bolady dep oılaımyn, nede bolsa kórýge jáne tek kórip qana qoımaı, shydaýǵa, jeńip shyǵýǵa bekemdenip otyrmyz. «Sabyr túbi - sary altyn», deıdi ǵoı qa­zaq halqy. Osy sabyrlylyq biz­diń senimdi serigimiz bolýy tıis.

Derekkózi: Qazaqaparat