Búgin Palata Spıkeri, Májilistegi «Nur Otan» partıasynyń fraksıa jetekshisi Nurlan Nyǵmatýlınniń tóraǵalyǵymen fraksıanyń keńeıtilgen otyrysy ótti. Onda  partıanyń  «Qazaqstan 2021: Birlik. Turaqtylyq. Jasampazdyq» atty saılaýaldy baǵdarlamasynyń oryndalýy týraly Úkimettiń esebi tyńdaldy.

Beınekonfensıa formatynda ótken keńeıtilgen jıynǵa Qazaqstannyń  Premer-Mınıstri Asqar Mamın, «Nur Otan» partıasy Tóraǵasynyń Birinshi orynbasary Baýyrjan Baıbek, sondaı-aq, Úkimet músheleri qatysty.     

Partıanyń saılaýaldy baǵdarlamasy týraly aıtqan Májilis Tóraǵasy Nurlan Nyǵmatýlın, Qazaqstannyń Tuńǵysh Prezıdenti – Elbasy, partıa kóshbasshysy Nursultan Ábishuly Nazarbaev parlamenttik fraksıanyń aldyna «Nur Otan» partıasynyń barlyq saılaýaldy mindettemeleriniń oryndalýyna tikeleı jáne qatań baqylaý jasaý mindetin qoıǵanyn atap ótti.

Bul úshin Májilistegi «Nur Otan» fraksıasy Úkimetpen ózara is-qımyl jasaı otyryp, apta saıyn Saılaýaldy baǵdarlamanyń oryndalý barysyna monıtorıń júrgizip, sondaı-aq alynǵan mindettemelerdi oryndaý úshin zańnamalyq negiz qalyptastyryp, jumysty júıeli túrde jolǵa qoıdy.

Sonymen qatar Májilis Tóraǵasy Nurlan Nyǵmatýlın «Nur Otan» fraksıasyna múshe depýtattar úkimettik zań jobalarymen jumys isteýmen qatar,  ózderi de 55 zań jobasyna bastamashy bolǵanyna nazar aýdardy.

Óz kezeginde, Úkimet basshysy baıandaǵandaı partıanyń saılaý aldyndaǵy mindettemeleri negizinen oryndaldy.

Premer-Mınıstri Asqar Mamınniń aıtýynsha, iri ınfraqurylymdyq jobalardy iske asyrý, avto jáne temir joldardy, zamanaýı logıstıkalyq jobalardy jańǵyrtý nátıjesinde 559 myń jumys orny quryldy. Mektepter men balabaqshalardyń qurylysy erekshe baqylaýda. 4 jyl ishinde 3 myńnan astam mektepke deıingi balalar mekemesi salyndy. Úsh aýysymdy jáne apatty mektepterdi joıý úshin 417 mektep paıdalanýǵa berildi. Bıyl-taǵy 56.

Asqar Mamın atap ótkendeı, agroónerkásipti qarqyndy damytý jónindegi mindet dáıekti jáne júıeli túrde sheshilýde. Aýyl sharýashylyǵy ınfraqurylymynyń 400-den astam jańa nysany iske qosyldy.

Úkimet qolaıly iskerlik ahýal qalyptastyrýǵa erekshe kóńil bólýde. Bıznesti júrgizý sharttaryn jaqsartý úshin retteýshi orta únemi jetildirilip, kedendik ákimshilendirý jaqsartylýda. «Doing Business» bıznesti júrgizý jeńildigi halyqaralyq reıtıńinde Qazaqstan álemniń 190 eliniń arasynda 25-oryndy ıelendi.

«Jańa áleýmettik saıasat» baǵdarlamasynyń baǵyty sheńberinde ataýly áleýmettik kómektiń jańa modeli engizildi. Reformalanǵan jumyspen qamtý ortalyqtary ámbebap qyzmetterdiń keń júıesin usynady. Kedeılik shegi eń tómengi kúnkóris deńgeıiniń 40% - ynan 70% - ǵa deıin ósti, bul muqtaj azamattardyń úlken sanyna áleýmettik kómek kórsetýge múmkindik beredi. Shaǵyn bızneske shaǵyn nesıe berý kólemi 31 mlrd. teńgeden 83 mlrd. teńgege deıin ulǵaıtyldy.

Medısınalyq qyzmetterdiń qoljetimdiligin, sapasy men tıimdiligin arttyrý úshin 2020 jyldyń qańtarynan bastap Mindetti áleýmettik medısınalyq saqtandyrý júıesi kezeń-kezeńimen engiziledi.

«Qaýipsizdik jáne turaqtylyq» baǵyty sheńberinde Úkimet Elbasy men Memleket Basshysynyń halyqaralyq bastamalaryn ilgeriletý jónindegi is-sharalardy dáıekti túrde iske asyrdy.

Májilis Spıkeri Nurlan Nyǵmatýlın birlesken jumys nátıjeleri týraly aıta kelip, buǵan eń aldymen, táýelsizdik jyldary Elbasy, Partıa Kóshbasshysy Nursultan Ábishuly Nazarbaevtyń strategıalyq baǵytynyń arqasynda elde turaqty ekonomıka qurylyp, altyn-valúta rezervteriniń úlken kólemi jınaqtalǵanyn, bul syrtqy syn-qaterlerge jaýap berýge múmkindik beretinin atap ótti.

Sonymen qatar Palata Spıkeri Úkimet memlekettik jáne salalyq baǵdarlamalardy iske asyrý arqyly saılaýaldy baǵdarlamany oryndaý úshin barlyǵyn jasaǵanyn alǵa tarta kelip, osy jyldar ishinde depýtattyq korpýs barlyq qajetti zańnamalyq bazany qalyptastyrǵanyn aıtty.

Osy oraıda Nurlan Nyǵmatýlın:

– «Nur Otan» partıasy elimizdegi negizgi jáne jetekshi saıası uıym bolyp tabylady. Sol úshin partıamyzdyń Tóraǵasy, Elbasymyz Nursultan Ábishuly Nazarbaev partıa aldyndaǵy barlyq mindetterdi, sonyń ishinde, saılaý baǵdarlamasyn oryndaý týraly árqashanda tapsyrma berip keledi. Sebebi, «Nur Otan» partıasynyń saılaý baǵdarlamasy ol – Elbasymyz aıtqandaı, eldi saqtaý, táýelsizdikti nyǵaıtý jáne ulttyń bolashaqqa baratyn joly. Sonymen birge, ol – saıası, ekonomıkalyq, áleýmettik bastamalardy júzege asyrýdyń kepili, – dedi.

Nurlan Nyǵmatýlınnniń aıtýynsha, VI shaqyrylym barysynda «Nur Otan» fraksıasy depýtattarynyń saılaý aldyndaǵy mindettemelerin qarjylyq qamtamasyz etý jónindegi usynystary respýblıkalyq búdjetten jalpy 138, 3 mlrd. teńge somasynda qoldaý tapty. Búdjet shyǵystary bilim berý, densaýlyq saqtaý salalaryn damytýǵa, sýmen jabdyqtaý, sý burý, aýyldyq eldi mekenderdi gazben jabdyqtaý, jalǵa beriletin turǵyn úı salý jáne t. b. máselelerdi sheshýge ulǵaıtyldy.

– Osynyń barlyǵy eldiń turaqty damýy men qazaqstandyqtardyń ómir súrý sapasyn jaqsartý jónindegi mindetterdi sheshýge múmkindik berdi. partıamyzdyń Kóshbasshysy Nursultan Ábishuly Nazarbaev jáne Memleket basshysy Qasym-Jomart Toqaev osyndaı mindetter júktedi, – dedi Májilis Tóraǵasy.

Sonymen qatar, jıyn barysynda birqatar máseleler belgili sebepter boıynsha tolyq kólemde oryndalmaǵany atap ótildi. Eń aldymen, olar naryqty otandyq azyq-túlik ónimderimen, sany 250 adamnan asatyn barlyq eldi mekenderdi joǵary jyldamdyqty ınternetpen qamtý, memlekettik jáne kvazımemlekettik sektordyń iri kompanıalaryn jekeshelendirý.

Otyrys barysynda, Nurlan Nyǵmatýlın:

– Koronavırýstyq pandemıa, álemdik naryqtardaǵy turaqsyzdyq - bul eskerýsiz qaldyrmaıtyn nárse ekeni túsinikti. Biz Úkimettiń osy máselelerdi sheshýde naqty joldary bar ekenin kórip otyrmyz, – dedi.

Májilis Tóraǵasy osy baǵytta qoıylǵan maqsattarǵa jetý úshin Úkimet barlyq qajetti sharalardy qoldanatyna senim bildirip, Parlament tarapynan baqylaýdy qamtamasyz etýdi jalǵastyratynyn jetkizdi.

Keńeıtilgen jıyn barysynda «Nur Otan» fraksıasynyń depýtattary qazaqstandyqtar úshin ózekti máselelerge nazar aýdardy. Birinshi kezekte, ol elimiz boıynsha ásirese, aýyldyq jerlerde jalǵa beriletin turǵyn úılermen qamtamasyz etý.  Sondaı-aq depýtattar qarjylandyrý men qurylys kólemin, onyń ishinde jergilikti búdjet qarajaty esebinen ulǵaıtý qajet dep sanaıdy. Jıynda ssy maqsattarǵa bólinetin búdjet qarajatyn tıimdi paıdalanýǵa jáne salynyp jatqan úılerdiń sapasyna baqylaýdy qatańdatý sıaqty basqa da máseleler qamtyldy.

Májilis depýtattarynyń pikirinshe, halyqty eńbekpen qamtýdyń belsendi sharalaryna tartýdy odan ári  jalǵastyryp, osy baǵytta  qabyldanǵan memlekettik baǵdarlamalardy úılestirýdi kúsheıtip, ol týraly halyqty turaqty aqparattandyryp turý qajet.