Elimizdiń barlyq zańdarynyń negizi bolǵan «Atazańymyzǵa»  20 jyl tolypty. Barlyǵyńyzdy osy aıtýly merekemen quttyqtaımyn!  Bir ǵasyrdyń 1/5 bolatyn 20 jyl ishinde elimiz úshin osy zańnyń róli qalaı boldy? Ata-babamyzdyń mura qylyp tastap ketken dalasyna Alashtyń armany bolǵan Táýelsizdigimizde «Atazańymyz» Qazaqqa qalaı qyzmet etýde? Neden utqanymyzdy otandyq telearnalarymyz aıtyp ta jatqan bolar. Biz neden utylyp jatqanymyzdy aıtyp, «atazańnyń» oryndalmaı jatqan jáne ózgertýge tıisti bir- eki bapyna toqtalyp keteıik.

«Atazańymyzdyń» betin ashyp oqyp bastaı salsańyz, mynadaı tamasha bapqa kóńilińiz tolady. 1- bólimniń 1- baby: «Qazaqstan Respýblıkasy ózin demokratıalyq, zaıyrly, quqyqtyq jáne áleýmettik memleket retinde ornyqtyrady, onyń eń qymbat qazynasy - adam jáne adamnyń ómiri, quqyqtary men bostandyqtary»,- delingen. Qalaı rıza bolmaısyń? Alaıda,  Geptıl men protonnyń ýyn jutyp otyrǵan adamnyń quqyqtary qorǵaldy dep aıtýǵa kelmes. Eger elimizdiń baılyǵy adam jáne onyń ómiri bolsa,  "Antıgeptıl" qoǵamdyq uıymynyń proton men geptıldiń adam ómirine qanshalyqty qaýipti ekeni týarly janaıǵaıyna bılik jaǵynan jaýaptar bolar edi. Ekonomıkalyq jaǵynan paıdaly bolǵandyqtan, adam ómiri men densaýlyǵyna tóndirer qaýipke qaramastan, Baıqońyr aılaǵynan ushyrylatyn «Proton» zymyran-tasyǵyshtary 2025 jylǵa deıin toqtatylmaıtyny týraly Talǵat Musabaev myrza aıtqan bolatyn.

 Din jaǵynan aıtsaq, zaıyrly el ekenbiz, durys. Biraq zaıyrly ekenbiz dep kóringen sekta men aǵymnyń oshaǵyna aınalmaǵanymyz jón. Bir ulttyń ulttyq belgisiniń biri- onyń tili. Al biz memleketti quraýshy ultpyz, bizdiń memleketimizdiń tili -qazaq tili. Memlekettik tilimiz- qazaq tili bolsa da, áli kúnge deıin resmı túrde memlekettik tildi tolyq mártebege ıe bola almaı otyr. Nege deseńiz, «Atazańymyzdyń» 7- bapynyń 2- tarmaǵynda: «Memlekettik uıymdarda jáne jergilikti ózin-ózi basqarý organdarynda orys tili resmı túrde qazaq tilimen teń qoldanylady»,- degen memleket tiline jasalǵan úlken qıanat tur. Aqyn, qoǵam qaıratkeri Muhtar Shahanov bastap Elbasyna osy tarmaqty alyp tastaý týraly neshe ret ashyq hattar jazsa da, osy tarmaqty alýǵa bizdiń bıliktiń shamasy áli de kelmeýde. Osy bap alynbaıynsha, bizdiń memlekettik tilimiz – ana tilimizdiń kósegesi kógermesi anyq. Ana tilimizdiń qadirine jetpeı turyp ata-baba amanatyn oryndadyq dep aıtýymyzǵa kelmes.

Pralment pen úkimet, sottar týraly bólimderin aıtyp sózdi kóbeıtip otyrýdyń qajeti bolmas. Atazańymyzda kórsetilgendeı, Memleketimiz óz aýmaǵynyń tutastyǵyn, qol suǵylmaýyn jáne bólinbeýin qamtamasyz etedi degen senimdemiz. 20 jasqa tolǵan «Atazańymyz» ata-baba amanatyn arqalap, urpaq aldynda adal qyzmet atqarydy degen senimdemiz.

Turdybek Qurmethan