Semeı qalasynda qarýdan bas tartqan kúnge oraı Túıemoınaq aralynda 15 000-ǵa jýyq adamnyń qatysýymen «Beıbitshilik aksıasy» ótip, Japonıadan ákelingen salmaǵy 100 keli, bıiktigi 3 metr quraıtyn «Hırosımanyń beıbitshilik tasy» eskertkishi ornatyldy. Bul týraly «Qamshy» portaly  SHQO-nyń Aqparat ortalyǵyna silteme jasaı otyryp habarlaıdy

         Qala turǵyndary, aımaq qonaqtary qatysqan aksıaǵa sonymen qatar, Qazaqstan Respýblıkasyndaǵy Japonıanyń Tótenshe jáne ókiletti elshisi Kamahara Masaósı jáne «Beıbitshilik Tasy» Asosıasıasy syndy halyqaralyq uıymdardyń ókilderi keldi.  

         – Elbasymyzdyń tapsyrmasymen búgingi kúni polıgonnyń zardaptaryn joıyp, halyqtyń densaýlyǵyn jaqsartý úshin memleket tarapynan biraz ister atqarylyp jatyr. Osy oraıda QR Tuńǵysh Prezıdenti Qorynyń qarjylandyrýymen  saýyqtyrý ortalyǵynyń qurylysy josparlanýda. Turǵyndar densaýlyǵyn jaqsartý maqsatynda sheteldik áriptesterdiń, sonyń ishinde Japonıa úkimetiniń atqarǵan jumysy zor. Biz ıadrolyq qarý zardaptaryn jaqsy bilemiz jáne bolashaqta sondaı qıynshylyqtardyń bolmaýy úshin birlese jumys jasaýymyz qajet. Osy oraıda, aksıaǵa qatysýshylarǵa, qala turǵyndaryna,oblys basshylyǵy atynan alǵys bildire otyryp, mıtıń jumysyna tabys tileımin, – dedi Jaqsylyq Omar.

         Túıemoınaq aralyna ornatylǵan «Hırosımanyń beıbitshilik tasyn» Japonıanyń «Kıodo Sýshın» aqparattyq agenttigi janyndaǵy «Hırosımanyń beıbitshilik tasy» úkimettik emes qory Hırosıma men Nagasakı qalalaryndaǵy jarylystyń 70 jyldyǵyna oraı Semeı qalasyna ákelgen. Eskertkishte beıbitshilik nyshany Kannon qudaıynyń kelbeti beınelengen.

         Sonymen qatar, shara barysynda qonaqtar Ulttyq ıadrolyq ortalyqtyń oblystyq tarıhı-ólketaný murajaıynyń kitaphanasynda saqtalyp kele jatqan muraǵat qujattarmen tanysty