25 qarasha kúni Fransıa senaty "Taýly Qarabaq Respýblıkasynyń" táýelsizdigin moıyndaý týraly qarar qabyldady. Qujatty qoldap 305 senator daýys berse, 1 senator ǵana qarsy daýys bergen. Ria.ru saıtynyń málimetinshe, senatorlardyń qarardyń qabyldanýyna "Taýly Qarabaqtaǵy armán halqynyń qaýipsizdigi men bostandyǵyna Ázerbaıjan kepildik bermeıdi" dep sanaǵandyǵy túrtki bolǵan. Al Ázerbaıjan prezıdentiniń apparaty atalmysh qarar qarapaıym qaǵazben teń ekenin málimdedi. Bul týraly aze.az saıty habarlady.

25 qarashada Fransıa senatynyń tóralqasynda armán dıasporasynyń yqpalyndaǵy bir top senatorlar "Taýly Qarabaq respýblıkasyn" taný qajettiligi týraly #145 qarar jobasyn usyndy. Qabyldanǵan rezolúsıada senatorlar "Ázerbaıjannyń túrik bıligi men sheteldik jaldamalylardyń qoldaýymen júzege asyrǵan áskerı agresıasyn" aıyptaǵan. Oǵan qosa 27 qyrkúıekten beri Taýly Qarabaqta júrgizilip jatqan urys qımyldary nátıjesinde Ázerbaıjan qarýly kúshteri men olardyń jaqtastaryn basyp alǵan terıtorıalardan tez arada shyǵarýǵa shaqyrady.

"Senat úkimetti Taýly Qarabaqtyń beıbit turǵyndaryna gýmanıtarlyq dálizder ashýdy talap etip, jappaı gýmanıtarlyq kómek kórsetýge shaqyrady" delingen qujatta.

Ázerbaıjan prezıdentiniń kómekshisi Hıkmet Gadjıevtiń aıtýynsha, Fransıa senatynyń 30 jyl ishinde halyqaralyq deńgeıde tanylǵan Ázirbaıjan terıtorıalaryn basyp alýǵa, beıbit turǵyndardy óltirýge, etnıkalyq tazartýǵa, ekologıalyq terrorǵa, jerge zańsyz qonystanýǵa jáne zańsyz ekonomıkalyq qyzmetke qatysty únsiz ustanymyn kórsetýi úlken ókinish týdyrady.

– Birinshiden, biz Ázerbaıjan úshin bul qarar qarapaıym qaǵazdan basqa eshnárse emes ekenin basa aıtqymyz keledi. Ózderiniń kishkentaı saıası ambısıalaryna berilip, qabyldanǵan bul qaǵaz halyqaralyq quqyqty, BUU qararyn jáne BUU qaýipsizdik keńesiniń tıisti qaýlylaryn óreskel buzýmen teń. Sondaı-aq Mınsk tobynyń teń tóraǵasy jáne Fransıanyń BUU qaýipsizdik keńesiniń turaqty múshesi retindegi qyzmetine baılanysty mańyzdy suraqtardy týyndatyp otyr, – dedi Gadjıev Fransıa senatynda Qarabaqty taný týraly qarar jobasyn qabyldaýǵa qatysty túsindirmesinde.

Gadjıev qarardy Fransıadaǵy ıslamofobıanyń kúsheıýiniń aıqyn mysaly dep sanaıdy. Onyń aıtýynsha, shetelden jaldanǵan lańkesterdiń urys qımyldaryna qatysqany týraly eshqandaı dálel keltirilmegen.

– Biz bul qarardyń qabyldanýyn fransýz saıasaty úshin óte uıat qadam dep sanaımyz. Fransıa úkimeti mundaı arandatýshylyq qadamdarǵa jol berilmeıtini týraly resmı ustanymyn bildirip, qarardy aıyptaı otyryp, Ázirbaıjannyń terıtorıalyq tutastyǵyn qoldaıtynyn bildirýi kerek, – dedi Ázerbaıjan prezıdentiniń kómekshisi sózin túıindep.

Qazir ázerbaıjandyq sarapshylar Fransıany Ázerbaıjandaǵy munaı jáne gaz salasynan shyǵaryp tastaýǵa shaqyryp jatyr. Sondaı-aq ony "Mınsk tobynan" da alyp tastaý kerek degendi alǵa tartyp otyr. Keıbiri Ázerbaıjan jerinen barlyq fransýz kompanıalaryn qýyp shyǵýdy usynýda.

Aze.az basylymynyń dereginshe, Fransıa tarapynan dál osy qoldaý túri onsyz da agressıvti Armenıanyń burynǵy áreketterin jalǵastyrýǵa jáne basyp alý faktisin nyǵaıtýǵa ıtermelegen.