AQSH-taǵy Mıssýrı shtatynyń dárigeri adamdarǵa maska kıip júrýdiń mańyzyn túsindirý maqsatynda koronavırýs ınfeksıasynan ólip bara jatqan adamǵa medısınalyq kómek kórsetip jatqandaı vıdeo túsirdi.

Kennez Remı "maska kıý ókpege jasandy jeldetkish ornatqandaı yńǵaısyzdyq týdyrmaıdy. Bul vıdeony túsirýime naýqastardyń ólimi áriptesterime qalaı áser etkenin kórgennen keıin týyndady" deıdi.

Dáriger vıdeoda Covid-19-ben aýyratyn adamnyń qalaı demalatynyn kórsetken. Naýqastyń jaǵdaıy nasharlaǵanda 1 mınýtta 40 ret qana dem ala alady. "Sizdiń ómirińizdegi eń sońǵy kún dál osylaı qorqynyshty aıaqtalmaıdy dep úmittenemin" deıdi vıdeoda.

Naýqasqa aýa jetpeı qınalǵanda kóbine dárigerden otbasyna olardy jaqsy kóretinin aıtýdy suraıdy eken. Sebebi qınalǵanda tiri qalatyna kúmándana bastaıdy. Dárigerdiń aıtýynsha mınýtyna 40 ret tynys alatyn jaǵdaıǵa jetkender kóbine aman qalmaıdy. Naýqastardyń aýyr ólimi dáriger, medbıkelerge áser etpeı qoımaıdy.

– Áriptesterimniń fızıkalyq jáne moraldyq turǵyda qalaı sharshaǵanyn kórip júrmin. Medısınalyq quraldardy alyp naýqastyń bólmesine kirgende ondaǵy aýyr jaǵdaıǵa kýá bolǵannan keıin sondaı sátterdi vıdeo arqyly baıandaýdy uıǵardym. Eger qoǵamdyq jerde maska kımeseńiz, araqashyqtyqty saqtamasańyz, qolyńyzdy jıi jýmasańyz ómirińiz dál vıdeodaǵydaı aıaqtalady.  

Dáriger koronavırýstan kóp adam tiri qalatynyn da joqqa shyǵarmaıdy, biraq aýrýhanaǵa jatqyzylyp, ókpege jasandy apparat qoıylsa, aman qalý eki talaı dep eskertedi.

–  Men sizderge eki nárseni eskertemin. Birinshiden, maska kıý ókpege plasmass apparatyn ornatqanǵa qaraǵanda álde qaıda jeńil ári ońaı. Aýrýdan ólip qalsańyz erkindiktiń quny bir tıyn. Ekinshiden, eger siz nemese sizdiń ata-anańyz, balańyz osy aýrýǵa shaldyqsa, sizdi de olardy da dál osyndaı ólim kútip tur. Bul –  oıynshyq emes. Sizderden ótinip suraımyn, saqtyq sharalaryn umytpańyzdar. Tek solaı ǵana aýrýdyń aldyn ala alamyz, –  dedi ol.