2020 jylǵy 21 qarashada Jambyl oblysynyń polısıa qyzmetkerleri T.Rysqulov aýdanynyń jaıylymyndaǵy qumǵa jaqyn mańdaǵy aımaqta qoıshy bolyp jumys isteıtin Jýaly aýdanynyń 42 jastaǵy turǵynyn ustady, odan 16 keliden  astam "keptirilgen marıhýana" esirtki zaty tabylyp, tárkilendi, dep habarlaıdy Qamshy.kz aqparat agenttigi Jambyl oblysy polısıa departamentiniń baspasóz qyzmetine silteme jasap.

Atalǵan derekke qatysty  qylmystyq kodekstiń 296-baby 4-bóligi (esirtki quraldaryn, psıhotroptyq zattardy, sol tektesterdi asa iri mólsherde ótkizý maqsatynsyz zańsyz daıyndaý, qaıta óńdeý, satyp alý, saqtaý, tasymaldaý) boıynsha sotqa deıingi tergeý bastalǵan.

Kúdikti óz kinásin moıyndady. Kúdikti qamaýǵa alyndy. Jambyl oblysy polısıa departamentiniń esirtki qylmysyna qarsy is-qımyl basqarmasynyń qyzmetkerleri jyl basynan beri 785 qylmystyq quqyq buzýshylyq deregin anyqtaǵan. Onyń ishinde 120 esirtki ótkizý deregi, 59 asa iri kólemde saqtaý deregi, 5 esirtki quraldarynyń kontrabandasy,  4 esirtki quraldaryn nasıhattaý nemese zańsyz jarnamalaý jáne 574 qylmystyq teris qylyq deregi bar.

Polıseıler zańsyz aınalymnan 3 tonnadan astam túrli esirtki zattaryn tárkiledi:  70 keli  gashısh, 2 tonna 907 keli  marıhýana, 1 keli  geroın jáne 2 keli sıntetıkalyq esirtki.