Dúısenbi, 30 qarasha kúni Aqtóbe oblysynyń ákimi Ońdasyn Orazalın Aqtóbe qalasynyń Nur-Aqtóbe turǵyn úı alabyndaǵy jańa úıdiń ashylýyna qatysty. 

«QR Tuńǵysh Prezıdenti kúnine» oraı uıymdastyrylǵan sharada aımaq basshysy 256 páterlik jańa turǵyn úıden UOS ardagerleri, kóp balaly, jetim jáne az qamtylǵan 30 otbasyna páter kiltterin tabystady.  

«Ár adam úshin ómirdiń qyzyǵy sanalatyn, otbasymen birge ósip-ónetin jeke shańyraǵy, qonysy. Búgingi bolyp jatqan qýanyshty jaıttyń bári de memleketimizdiń kúnnen-kúnge damyp, ál-aýqatynyń ósip, Memleket basshysynyń júrgizip otyrǵan sarabdal saıasaty men el azamattarynyń aýyzbirliginiń arqasynda bolyp otyr. Jyl ótken saıyn qalamyzdyń aýmaǵy keńeıip, úı alǵysy keletin turǵyndardyń suranysy artyp keledi. Biz bar kúsh-jigerimizdi jumyldyryp, qala turǵyndarynyń jyly ári jaıly úıde alańsyz ómir súrýine qolaıly jaǵdaı jasaýǵa jumystanyp jatyrmyz. Búgingi alyp otyrǵan shańyraqtaryńyzdy ishi qut-berekeli bolyp, ósip kele jatqan jas balalarymyz bilimdi ári bilikti urpaq bolyp, elin súıetin patrıoty bolyp óssin. Ýaqytpen sanaspaı, azǵana ýaqyt ishinde osyndaı sapaly úıdi turǵyzǵan qurylysshylarǵa da alǵysymdy bildiremin» - dedi oblys ákimi jańa qonys ıelerin quttyqtap.  

Aıta keteıik, qazirgi tańda Aqtóbe qalasynda turǵyn úı kezegine 24 myńnan astam adam tirkelgen. «Baqytty otbasy» - «2-10-20» baǵdarlamasy aıasynda 3 mlrd teńgege 302 joldama berilip otyr. Búgingi kúni jalpy somasy 2,37 mlrd teńgege 276 otbasyna nesıe berildi.    Sodan keıin aımaq basshysy Uly Otan soǵysynyń ardageri, Aqtóbe qalasynyń 96 jastaǵy turǵyny Ánýar Safuly Ahmetzıanovtyń otbasyna arnaıy baryp, ardagerge syı-qurmet kórsetip, bir bólmeli páterdiń kiltin tabystady. Uly Otan soǵysynyń ardageri Ánýar Ahmetzıanov kóp jyldar boıy aımaqtyń ósip-órkendeýi men áleýmettik-eknonomıkalyq damýyna zor úlesin qosqan batagóı aqsaqaldyń biri. Aımaq basshysynyń jaz aıynda Temir aýdanynyń Keńqıaq aýylyna jasaǵan issapary barysynda bolǵan kezdesýin eske alyp, qarttaryn qadirleıtin qasıetine rızalyǵyn bildirip, rahmetin aıtty.    

Kezdesý sońynda ardager qarıa óziniń alǵysyn bildirip, elimizdiń tynyshtyǵy basty baılyq ekenin atap ótip, oblysy ákimine jáne qala basshysyna jasap jatqan jumystaryna oń baǵasyn berdi.