Memleket basshysy Qasym-Jomart Toqaev reformalar jónindegi joǵary keńestiń otyrysyn ótkizdi, dep habarlady Aqorda saıty.

Prezıdent joǵary keńeste sot jáne quqyq qorǵaý júıelerin reformalaý máselesine nazar aýdardy.

Onyń sózinshe, sot jáne quqyq qorǵaý qyzmetine ozyq IT-tehnologıany engizý jáne sıfrlandyrý jumystaryn jalǵastyrý kerek. Sýdıalar korpýsy men quqyq qorǵaý organdaryndaǵy jeke quramnyń kásibı biliktiligin arttyrýǵa basa mán berý qajet.  

– Bizge júıeli, sonyń ishinde, kadrlyq sıpattaǵy sharalar qabyldaý kerek. Joǵarǵy Sottyń sýdıasy nemese oblystyq sottardyń tóraǵasy bolsyn sýdıa laýazymyna  taǵaıyndaǵan kezde, eń aldymen, sýdıalar korpýsynyń ózinde úlken másele týyndaıdy. Olar bir-birin kásibı biliksiz, jeke jáne basqa da baılanystaryn paıdalanady dep kinálaıdy. Osy tıimsiz tendensıalardy birjola joıý qajet, – dedi memleket basshysy.

Qasym-Jomart Toqaev óz sózinde reformalar júrgizý barysynda barlyq zańnamalyq ózgerister muqıat ári egjeı-tegjeıli pysyqtalýy kerek ekenin aıtty.

– Bul jerde mynadaı máselelerdi túsiný mańyzdy: Qylmystyq jáne qylmystyq-prosessýaldyq zańnamanyń jıi ózgerýi quqyq qoldaný tájirıbesiniń turaqtylyǵyna nuqsan keltiredi. Qatelesý qaýpin arttyrady. Bul azamattarymyzdyń taǵdyryna áser etýi múmkin. Sondyqtan bul baǵyttaǵy qadamymyz durys. Kelesi jyly osy saladaǵy reformalar jaqsy qarqyn alyp, naqty nátıjeler kórsetýi tıis, – dedi Toqaev.

Qasym-Jomart Toqaev joǵary memlekettik basqarýdyń barlyq júıesi Qazaqstan halqyna adal, shynaıy qyzmet etýi kerek ekenin aıtty. Memlekettik basqarýdyń barlyq júıesin – memlekettik qyzmetten jergilikti ózin-ózi basqarý deńgeıine deıin is júzinde qaıta qurý qajet.

Jıyn qorytyndysy boıynsha, prezıdent janyndaǵy reformalar jónindegi joǵary keńestiń 2021 jylǵa arnalǵan jumys jospary jáne konsýltatıvtik komıtetterdiń quramy bekitildi.