"Konstıtýsıaǵa sáıkes 10 Jeltoqsan 18.01-den saılaýǵa túsetin partıalardyń úgit-nasıhat naýqany bastaldy. Kezekti saılaýdyń saıası merzimin 3 kezeńge bólip qarastyrýǵa bolady.

Birinshiden, kandıdattardy tirkeý ıaǵnı úgit aldyndaǵy kezeń. Osy kezeńde partıalar tıimdi jáne qaǵylez jumys isteı bastady. Bir partıa tipti saılaý taǵaıyndalmaı turyp óz ishinen irikteýdi erte bastasa, keıbir partıa ataýyn ózgertti. Jınalystaryn jańa formatta ótkizip, nemquraılylyqtan arylyp, baǵdarlamalaryn pysyqtady. Saılaý prosesiniń negizgi qatysýshylary saıası partıalar men OSK jaqsy uıymdastyrýshylyq áleýetin kórsetti. 10 jeltoqsanda saıası partıalar arasynda jerebe oınatylyp, olardyń búlletendegi kezektiligi anyqtaldy.

Bul kezeńniń eń basty ereksheligi kandıdattar quramy aıtarlyqtaı jańardy. Atap aıtqanda, Májiliske qazirgi depýtattardan 34-i ǵana qaıta úmitker boldy. Bul osy depýtattar qaıta saılandy degen kúnniń ózinde Májilis 63 paıyz jańarady degen sóz.

Ekinshi, úgit-nasıhat naýqany. Bir aı mezgil partıalardyń saıası dodada básekelestigin, memlekettik basqarý men qoǵamdy damytýda ómirsheńdigin dáleldeıtin ýaqyt. Alǵashqy kúnnen biz kandıdattardyń, saılaý shtabtarynyń naýqandyq qarbalastyǵyn baıqadyq. Mysaly alǵashqy mınýttarda «Aýyl partıasy» respýblıkalyq shtabynyń jınalysyn ótkizdi. Saılaý prosesi ekonomıkalyq daǵdarys pen koronavırýstyq karantınge qaramastan ishki turaqtylyq jaǵdaıynda júrip jatyr.

Úshinshi kezeń, árıne saılaý kúni. Al, saılaýdyń qalaı ótip, kreslolardyń kimniń enshisinde tıetini saılaýǵa túsken saıası partıalardyń alǵashqy eki kezeńde júrgizgen jumysyna baılanysty" dep jazdy jýrnalıs.

Al Eýrazıalyq ıntegrasıa ınstıtýtynyń sarapshysy Baýyrjan Serikbaev tartysty saıası naýqan bolatynyn atap ótti.

"Saıası partıalar óz úgit-nasıhat jumystaryn bastady. Naýqan bastalmaı turyp eki partıa rebrendıng jasady. Óz baǵdarlamalaryn, baǵyttaryn belgiledi. Sıezerin ótkizdi. 10 jeltoqsanda saǵat 18:01-den bastap saıası partıalar belsendi túrde eldi nasıhattaýǵa kóshti. Halqymyz da óte muqıat tyńdap, baqylap otyr. Jalpy qyzyq bolyp jatyr endi. Búgin Astana qalasynda bılbordtar iline bastady. Bul da buqarany ózińe tartýdyń bir joly. Tartysty saıası naýqan bolatyn sekildi. Bizdiń qoǵam da Facebook-te pikirin bildirip jatyr. Bul da durys. Eń tartysty báseke onlaın álemde bolady. Qarqyndy ótýde. Osylaı bolǵany da jaqsy. Ne bar kóshede?.. Tońyp, jaýrap. Qystyń sýyǵynda bári onlaın Facebook-te bolǵany jaqsy ǵoı negizi. Jalpy bul saılaý bizdi bir saty alǵa jyljytatyn, saıası mádenıetti kóteretin naýqan bolady dep úmittenemin" dep jazdy ol Facebook-tegi paraqshasynda. 

Atalmysh ınstıtýttyń taǵy bir sarapshysy Samat Nurtazanyń pikirinshe, ár partıa óziniń ortalyqtaryn kórsetip, barlyq partıaǵa BAQ ókilderi birdeı kózqaras tanytyp jatyr.

"Men Óskemende eldiń qamymen shapqylap júrgende, el aǵalary Úgit-nasıhat naýqanyn bastap jiberipti. Keshe Nur-Sultanǵa kelsem, barlyq partıanyń ókilderi habarlasyp «Sákem-aý, bizdiń partıaǵa ótseńshi» dep jyly shyraı bildirip jatyr. Elimizdiń demokratıalanǵanyna rıza boldym. Facebook jelisi qaınaǵan qazandaı burqyldap, ár partıa óz jumysyn pash etýge qulshynyp jatqany baıqaldy. Ár partıa óziniń ortalyqtaryn kórsetip, barlyq partıaǵa BAQ ókilderi birdeı kózqaras tanytqandaı sezildi. «Men eleýsiz qaldym, meni yǵystyryp jatyr» degen bir partıa ókilderin kórmedim. Qýantarlyq jaǵdaı. Es jınap, etek jeńimizdi jınap, el boldyq degen osy. Kósheni aıtsańshy, kóshede bılbordtar partıa jarnamasymen turǵanda, ózińdi Tramp pen Baıdenniń taǵdyryn sheshetin azamattaı sezinip qaldym. Láıim, sol demokratıanyń atasy Qazaq elinde ornaıdy. Óz basym soǵan senemin" dep áleýmettik jelide oıymen bólisti.