Ýkraına prezıdenti Vladımır Zelenskıı The New York Times gazetine bergen suhbatta Amerıkadaǵy saılaýda jeńimpaz atanǵan Djo Baıdenniń prezıdenttiginen qandaı úmit kútetini týraly aıtyp berdi.

Zelenskıı AQSH-tyń saılanǵan prezıdentiniń Kıevpen "tyǵyz baılanysyn" jáne onyń ýkraın mentalıtetiniń erekshelikterin túsinetinin atap ótti.

– Bul shynymen qarym-qatynasty nyǵaıtýǵa, Donbastaǵy soǵysty sheshýge jáne bizdiń aýmaqty jaýlap alýdy toqtatýǵa kómektesedi. Amerıka Qurama Shtattary kómektese alady, – dedi Ýkraına prezıdenti.

Zelenskıı Amerıkanyń qazirgi tańdaǵy prezıdenti Donald Tramptyń ákimshiligine qoldaý kórsetkeni úshin, onyń ishinde Reseıge qarsy sanksıalardy qatańdatqany úshin rızashylyǵyn bildirdi. Sonymen birge ol amerıkalyq bılik kóp nárseni isteı alatynyn atap ótti. Mysaly, Donbastaǵy "qaqtyǵysqa jaqyn úkimet basqaratyn aýdandarǵa" ınvestısıalardy belsendi túrde yntalandyrý.

Ýkraına prezıdenti AQSH-ty Qyrymdy "qaıtarý" máselesinde kómektesýge shaqyrdy.

– Qazir biz "Qyrym platformasyn" quryp jatyrmyz, árıne, onda Qyrymdy qaıtarýdyń negizgi oıynshylary sanalatyn elderdi kórgimiz keledi. AQSH bul baǵytta kóshbasshy bola alar edi, – dep tolyqtyrdy Zelenskıı.

Donbastaǵy jaǵdaı aıasynda Máskeý men Kıev arasyndaǵy qarym-qatynas nasharlaǵan. Ýkraına bıligi buǵan deıin Máskeýdi eldiń ishki isterine aralasqany úshin birneshe ret aıyptaǵan. 2015 jyldyń qańtarynda Ýkraınanyń Joǵarǵy radasy Reseı "agresor el" dep málimdeme jasaǵan.