Shymkentte Táýelsizdik merekesi qarsańynda jastar qaýymyna da erekshe tartý jasaldy. №6 kolejdiń 300 oryndyq jańa oqý ǵımaraty paıdalanýǵa berildi. Áleýmettik nysandy turǵyzýǵa oblystyq búdjetten 260 mıllıon teńge bólingen.

80 jylǵa jýyq tarıhy bar bilim mekemesi aspaz, kondıter, naýbaıshy sıaqty bilikti orta býyn mamandaryn daıarlaıdy. Buǵan deıin bir qabatty eski ǵımaratta jumys atqarǵan. Sońǵy jyldary munda ýaqyt talabyna saı barmender men daıashylar, marketolog-satýshylar da ázirlene bastady. Úsh qabatty eńseli jańa ǵımaratta arnaıy pán kabınetteri, lıngafon bólmesi jáne sport zaly bar. Sońǵy úlgidegi jańa qural-jabdyqtar da bilim sapasyn arttyrýǵa negiz bolady, - deıdi ustazdar qaýymy. Búginde kolej 140-tan astam mekememen stýdentterdi eńbek tájirıbesinen ótkizip, jumysqa ornalastyrý jóninde kelisim-shartqa otyrǵan. Stýdentter men oqytýshylar birlesip daıyndaǵan birneshe joba respýblıkalyq, tipti, halyqaralyq baıqaýlarda laıyqty joǵary baǵasyn alypty. Rahıma Qojamjarova, kolej dırektory: – Birneshe jobamen jumys istep jatyrmyz. Onyń biri – arnaıy pánderdi berý baǵytynda jańa tehnologıalar engizý. Endi, soǵan jaǵdaı jasalǵan. EXPO-2017 bárimizge ortaq qýanyshty da jaýapty tirlik, soǵan biz de daıyndalyp jatyrmyz. Osynyń aldynda «Qazaqstan brendi – qurt» degen jobamen shyǵyp, sol jobaǵa patentti aldyq.

Derekkóz: baq.kz