Prezıdent Qasym-Jomart Toqaev Egemen Qazaqstan gazetinde jarıalanǵan "Táýelsizdik bárinen qymbat" maqalasynda jer máselesi, onyń tutastyǵy týraly aıtty.

– Qazaqstan – birtutas memleket. Elimiz ońtústik, soltústik, batys, shyǵys dep bólinbeıdi. Bul – tek baǵytty bildiretin shartty ataýlar. 2018 jyly Elbasynyń Jarlyǵymen Ońtústik Qazaqstan oblysyna Túrkistan ataýy berildi. Tarıhı ádildikti qalpyna keltirgen oryndy sheshimdi halyq biraýyzdan qoldap, óte jyly qabyldady. Óıtkeni, mundaǵy shejireli shahar ǵana emes, tutas óńir kóne zamandardan beri Túrkistan dep atalǵan. Osy ıgi úrdisti elimiz boıynsha jalǵastyrýǵa bolady. Biz mundaı qadamdardy baıyppen jasaımyz. Bárimiz aıqyn biletin jáne buljymaıtyn aqıqat – qazaqtyń jeri eshbir sheteldiktiń menshigine berilmeıdi, eshqashan satylmaıdy. Osyny ár azamatymyz sanasyna berik sińirýi qajet. Kelesi jyly Jer kodeksiniń jekelegen normalaryna qatysty engizilgen moratorııdiń merzimi aıaqtalady. Aýyl sharýashylyǵy maqsatyndaǵy jerlerdi aınalymǵa engizip, halyqtyń ıgiligine jaratý – óte mańyzdy másele. Sondyqtan, bıyl Jer máselesi jónindegi komısıany quryp, sonyń aıasynda bir baılamǵa kelgen jón, – dedi prezıdent.