Talaı jyldan beri qazaqstandyq qoǵamnyń qyzý talqysyna túsip kelgen Baıqońyrdaǵy qazaq mektepterdiń problemasy aqyry oń sheshimin tapty. «Juldyzdy qaladaǵy» 6 qazaq mektebi elimizdiń bilim berý standartyna kóshti, – dep habarlaıdy «Qamshy» portaly www.qazaquni.kz saıtyna silteme jasaı otyryp. Bul týraly qazaqstandyq BAQ-qa oblys basshysynyń baspasóz qyzmeti málimdegen.
Esterińizde bolsa, byltyrǵy jyly Ortalyq komýnıkasıa qyzmetiniń brıfıńinde Qyzylorda oblysynyń ákimi Qyrymbek Kósherbaev osy bir túıtkildi máseleni ótkir kóterip, qoǵamda úlken talqylaýǵa túsken bolatyn.
“Qazaqtyń balalary qazaq mektebinde kitap betin ashady da meniń prezıdentim Pýtın deıdi. Olardyń bolashaǵy qalaı qalyptasady? Olardan qandaı patrıot, qandaı azamat shyǵady? Ekinshi bir problemasy bar. Olar bizdiń UBT-ǵa qatysa almaıdy. Sonyń kesirinen Qazaqstannyń Joǵarǵy oqý oryndaryna túse almaıdy. Olardyń zańdy quqyqtaryna shekteý. Biz bul máseleni sheshýimiz kerek”, – degen bolatyn.
(Sýret)
Al bıylǵy jyldyń shilde aıynda Q.Kósherbaev myrza « «Baıqońyr qalasyndaǵy mektepterimizdi qazaqstandyq standartqa kóshirý máselesi oń sheshimin tabýda. Jyl aıaǵyna deıin eki eldiń bilim jáne ǵylym mınıstrlikteri arasynda barlyq qajetti qujattarǵa qol qoıylady degen senimdemin. Sóıtip, 2015 jyldan bastap baıqońyrlyq mektepter bizdiń eldiń standarty boıynsha jumys isteıtin bolady», - degen bolatyn.
Qyrymbek Kósherbaıev bergen ýádesinde turdy. 2015 jyldyń 1-qyrkúıekten bastap Baıqońyrdaǵy 6 qazaq mektebi ózimizdiń bilim berý standartymen jumys isteıdi. Bıylǵy oqý jylynda 642 baıqońyrlyq búldirshin joǵarydaǵy mektepterdiń birinshi synybyna barǵan.
№277 K.Toqmuhamedov atyndaǵy mektepte ótken «Alǵashqy qońyraý» saltanatynda oblys ákimi Qyrymbek Kósherbaevtyń ózi qatysyp, elbasynyń atynan birinshi synyp oqýshylaryna «Meniń Otanym – Qazaqstan» atty QR Prezıdenti Nursultan Ábishulynyń kitabyn tabys etken.
“Bıylǵy oqý jyly barshamyzǵa úlken qýanyshpen bastalyp otyr. Óıtkeni Reseıdiń oqý standartyna ótip ketken qazaq mektepterin ózimizge qaıtaryp aldyq. Búginnen bastap osyndaǵy 6 qazaq mektebi otandyq bilim berý júıesimen jumys isteıdi. Bul Táýelsiz elimiz úshin jáne osyndaǵy qarakóz balalarymyzdyń bolashaǵy úshin mańyzdy”,- dedi Q.Kósherbaev.
Ata-analardyń da qýanyshynda shek joq. Túıtkildi problemany sheship bergen el basshylyǵyna alǵystaryn aıtyp jatty.
2015 jylǵa atalǵan 6 bilim berý nysandarynyń shyǵyndaryna respýblıkalyq búdjetten 982,1 mln. teńge qarjy bólindi. Mundaǵy mektepterge qajetti 90442 dana oqýlyq tolyǵymen jetkizilgen. Bir sózben aıtqanda, barlyq kerek-jaraǵy túgeldendi.
Nurzat Toǵjan
