Qytaı Halyq Respýblıkasynyń tóraǵasy Sı Szınpın álemdik ekonomıkalyq forýmda Baıden Tramptyń Qytaıǵa qatysty saıasatyn jalǵastyratyn bolsa, soǵys bastalatynyn eskertti.

Sı Szınpın koronavırýs saldarynan bolǵan ekonomıkalyq daǵdarystan shyǵý jolyn usyný arqyly pandemıany syltaýratyp bóliný men oqshaýlaný úshin qoldanylmaýy qajet ekenin aıtty.

Qytaı basshysy Djo Baıdenniń esimin atamasa da, AQSH-ty da aýyzǵa almasa da sózi arqyly Qytaı Vashıngtonnyń yrqyna kónbeıtinin jetkizdi.

– Soǵys ashý, bas tartý, bireýge qoqan-loqy kórsetý, qorqytý, sanksıa salý men taýar jetkizýdi toqtatý álem daǵdarysyna ákelip soǵady. Eshbir el óz betinshe álemdik deńgeıdegi máseleni sheshe almaıdy. Máseleni sheshý úshin bólinbeýimiz qajet, – dedi Sı Szınpın.

Sı Szınpın Qytaıdaǵy uıǵyrlar men Gonkongta bolǵan oqıǵaǵa baılanysty Donald Tramptyń hatshysy Maık Pompeonyń "genosıd jasady" degen aıyptaýyn da qabyldamaıtynyn jetkizdi.

– Álemde mádenıeti, tarıhy, áleýmettik júıesi birdeı el joq. Ár memlekettiń ereksheligi bar. Eshqaısysy bir-birine uqsamaıdy. Elderdiń ártúrli bolýy dabyl qaǵýǵa sebep emes. Jekkórýshilik sezimi, tákapparlyq, óz mádenıetin, tarıhyn, áleýmettik júıesin tańý dabyl qaǵýǵa turady, – dep sózin qorytyndylady Sı Szınpın.