Osy aptada Reseı bıligi Navalnyıdy shartty túrde sottaý sheshimderin ózgertip, úsh jarym jylǵa bas bostandyǵynan aıyrdy.

Navalnyıdyń aımaqtyq úılestirýshisi Leonıd Volkov Pýtınniń oppozısıonerdi túrmege jabýy "strategıanyń bir bóligi" dep málimdedi.

AFP basylymyna suhbat bergen Volkov "sot úkiminen keıin orys halqy Navalnyıdy odan ári qoldaı túsedi" dep sanaıdy.

The Moscow Times aqparatynsha, Navalnyıdyń "Pýtınniń jaqyn dostarynyń, odaqtastarynyń, Pýtın olıgarhtarynyń aktıvterin jarıa etýi, olardyń halyqtan jasyrǵan aqshasy men baılyqtaryn ashýy" bılikke úlken soqqy bolǵan.

Al ótken aıda Eýroparlament depýtattary EO elderin "Reseıge qarsy sanksıalardy qatty kúsheıtýge shaqyrdy" delingen Eýropalyq parlamenttiń baspasóz habarlamasynda.

Eýropalyq parlamenttiń osy máselege qatysty qaýlysy 581-50 daýyspen maquldandy. Olar Navalnyıdyń túrmege qamalýyna qatysy bar "jeke jáne zańdy tulǵalarǵa" sanksıa salý týraly sheshim qabyldady.

Brıfıńte Eýroparlament depýtattary "EO endi shyǵý tegi túsiniksiz Reseı baılyǵyn teserýi kerek" dep atap ótti.

Sonymen qatar aldaǵy ýaqytta Germanıa da Reseıge qarsy sanksıalar qarastyratyny jarıalandy.

Germanıa kansleri Angela Merkel Navalnyıdyń qamaýǵa alynýyn "kez kelgen zań normalaryna qaıshy" dep sıpattady.

Reseı oppozısıoneriniń túrmege jabylýy Reseı astanasy Máskeýde sherýlerge sebep boldy.

Áleýmettik jelige jarıalanǵan vıdeolarda polısıanyń narazylyq bildirýshilerdi uryp, qaqtyǵysyp jatqany kórsetilgen.

Habarlamalar alǵashqy ár tolqý kezinde 4 myńnan astam adam qamaýǵa alynǵan dep boljaıdy.

Navalnyı Pýtın ákimshiligin jemqor dep synaǵan. Sonymen qatar Reseı prezıdentin byltyr tamyzdaǵy "ýlaý oqıǵasynyń artynda tur" dep aıyptady.