VVS Qytaıdaǵy az ulttarǵa arnalǵan lagerlerdegi áıelderdi júıeli túrde zorlaý jáne azaptaý týraly egjeı-tegjeıli habarlady. Maqala AQSH memlekettik departamentiniń nazaryn aýdaryp, departament málimdeme jasady.

AQSH memlekettik departamentiniń ókili burynǵy ustalǵandar men kúzetshilerdiń suhbattaryna negizdelgen VVS maqalasyna súıenip "qatygezdikter bizdi qatty alańdatty. Bul qatygezdikter ar-ujdanǵa da aýyr soqqy. Mundaı saıasaty úshin Beıjińge úlken saldary bar jaýap qaıtarý kerek" dep aıtty..

Avstralıanyń Syrtqy ister mınıstri Marıs Peın de máselene ún qosyp, Birikken Ulttar Uıymy aımaqqa "jedel barýy kerektigin" aıtty.

– Biz ashyqtyqty óte mańyzdy dep sanaımyz jáne Qytaıdan halyqaralyq baqylaýshylarǵa, sonyń ishinde BUU-nyń Adam quqyqtary jónindegi Joǵarǵy komısary Mıshel Bacheletke Shyńjańǵa jedel jáne shekteýsiz túrde kirgýe múmkindik berýin talap etemiz, – dedi ol.

Al Qytaıdyń syrtqy ister mınıstrligi aqparatty "jalǵan habarlama" dep úzildi-kesildi joqqa shyǵardy.

VVS maqalasynda Qytaıdyń Shyńjań aımaǵyndaǵy ishki lagerlerde jappaı azaptaý, jynystyq zorlyq-zombylyq týraly aıyptaýlar egjeı-tegjeıli sıpattalǵan. Maqalanyń bas sýretine Saıragúl Saýytbaıdyń sýreti qoıylyp, ony "jappaı jynystyq zorlyq-zombylyq kýágerleriniń biri" dep jazǵan.

Táýelsiz esepter boıynsha, búginde lagerlerde mıllıonnan astam adam qamaýda otyr. Beıjiń lagerler az ulttardy "qaıta tárbıeleý" úshin salynǵanyn aıtady.