Nur-Sultan qalasynyń ákimi Altaı Kólginov óziniń orynbasary Baqtıar Mákenniń otstavkasyn qabyldamaı, oǵan qatań sógis jarıalady, dep habarlady qala ákimdiginiń baspasóz qyzmeti.

Ákim orynbasary "QR memlekettik qyzmeti týraly" Zańǵa sáıkes qolastyndaǵy qyzmetker – mádenıet basqarmasynyń jemqorlyǵy úshin otstavkaǵa ketýge ótinish bergen.

Alaıda Baqtıar Máken jetekshilik etetin bilim berý, din, jastar saıasaty, halyqtyń áleýmettik osal toptarymen jumys jáne taǵy da basqa áleýmettik mańyzdy salalarda júrgizilip jatqan jumystardyń joǵary tıimdiligi men nátıjeliligi, sondaı-aq qylmystyq iske qatyspaýy eskerilip, Baqtıar Mákenniń otstavkasy qabyldanbaǵany habarlandy. Tek qatań sógis jarıalanǵan.

Baqtıar Máken 2016 jyly Qazaqstan Respýblıkasy parlamenti májilisiniń depýtaty bolǵan. Oǵan deıin Batys Qazaqstan oblysy ákiminiń orynbasary qyzmetin atqarǵan. 2019 jyldyń 10 shildesinde Nur-Sultan qalasy ákiminiń orynbasary qyzmetine kirisken.