Ol ómirge kelgende týǵan áke-sheshesi odan bas tartyp, balalar úıine tastap ketti. Keıin ony balalar úıinen jańa ata-anasy asyrap aldy.

Ol mektepte álimjettilik kórdi. Sol sebepti ýaqytty jalǵyz ótkizgendi quptaıtyn. Biraq qorlaýǵa qatty ushyrǵan soń, basqa mektepke aýysýdy nemese múlde mektepte oqymaýdy sheshti. Baqytyna qaraı, ol jańa aýysqan mektebinen alǵash kompúterlerdi kóredi. Sol kezde ol 12 jasta edi.

Ol sonda alǵash kompúterlik sabaqqa qatysty. Ol óte aqyldy bala edi, biraq eshqashan mektep júıesin jaqsy kórmedi. Dástúrli emes jolmen úırengendi jaqsy kóretin onyń mekteptegi GPA baǵasy 4 baldan 2.65 bal boldy. Sol boıynsha ol jaqsy da emes, nashar da emes, ortańqol oqýshy sanaldy.

Ol mektep bitirgen soń, Rıd kolejine tústi. Biraq 6 aıdan keıin oqýdan shyǵyp qaldy. Degenmen oqýdan shyǵyp qalsa da, ózi qyzyqqan sabaqtarǵa beıresmı túrde qatysyp júrdi. Sol kezder onyń tek qana ómir súrý úshin jantalasyp júrgen kezi edi. Onyń jatatyn jerdi de joq boldy. Sol sebepti dosynyń bólmesinde jatty jáne bosaǵan bótelkelerdi 5 sentke qaıtaryp, tamaq satyp alatyn.

Sol jyldar onyń ómirindegi eń qıyn ýaqyttar boldy. Sodan keıin Úndistanǵa bardy. Úndistandaǵy ýaqyt onyń ómirin ózgertýge kómegin tıgizdi. Sondaǵy alǵan medıtasıa, jiger, rýhy ony keıin tarıhtaǵy eń uly adamdardyń biri etýge sebepshi boldy.

Ol dosymen birge garajda ózderiniń kompanıasyn qurdy. Dosy ekeýi qurǵan kompanıa 10 jyldyń ishinde 2 mlrd dollarlyq alyp kompanıaǵa aınaldy. Ol kompanıa Apple, keıipkerimiz Stıv Djobs edi.

1984 jyly Apple kompanıasy eń alǵashqy kompúterlerin jarıa etti. Alaıda satylym oıdaǵydaı bolmaı shyqty. Saldarynan 1985 jyly Stıv Djobs óz kompanıasynan shyǵaryldy. "30 jasymda men jumystan shyǵaryldym, dalada qaldym. Men sol kezge deıin jasaǵan isimnen, eńbegimnen bir-aq kúnde aıyryldym" degen edi Stıv Djobs. Onyń aıtýynsha, sol kezdegi jaǵdaı Djobsqa óte aýyr tıgen. Ol úmitin úze bastady.

Stıv Djobs basynan nebir aýyr jaǵdaılar ótse de, ony "jasyrylǵan baqyt bolar" dep túsingenin aıtty.

"Alǵashynda men bilmedim. Biraq kompanıadan jumystan shyǵarylý – meniń ómirimde bolǵan eń keremet is" degen ol eske alyp. Stıv Djobs Apple-dan shyǵyp qalǵan soń óziniń kreatıvti ómiri bolǵanyn aıtty.

Sol ýaqyttarda ol jańa kompanıa qurǵan jáne belgili deńgeıde jetistikke jetken, degenmen qıynshylyqtar da kezikken. Sol jyldary Microsoft kompanıasynyń damýyna baılanysty Apple qıynshylyqtarǵa ushyrap, bankrot bolýǵa jaqyndaıdy. Kompanıa Stıv Djobsty qaıta shaqyrady. 1997 jyly ol Apple-ǵa oraldy.

Stıv Djobstyń bastaýymen kompanıa zymyrandaı kóterilip damydy. Onyń bir úlken sebebi Stıv Djobs kapıtalızm ramkasynan shyǵyp oılaı alatyn: Djobs eń mańyzdy is, naryqtyq ekonomıkadaǵy paıda emes, qaıta, sapa jáne kemeldilik dep sanaıtyn. Ózgeshe ustanymyna baılanysty tek paıdany kózdeıtin ınvestorlarmen kelispeı qalyp júrdi. Sol sebepti de kompanıadan shyǵarylǵan-dy.

Keıinirek Apple kompanıasy tarıhtaǵy eń alǵashqy trıllıon dollarlyq kompanıaǵa aınaldy. Ókinishke qaraı Stıv Djobs 2011 jyly ómirden ozdy. Degenmen onyń jetistigi, isteri, ǵıbaratty sózderi keıinge qaldy.

Stıv Djobs ádettegi stýdent edi, ómirinde talaı ret sátsizdikke ushyrady, talaı márte beti qaıtaryldy, jumystan shyǵaryldy, úmitsizdendi. Biraq ol alǵan betinen qaıtpaı eń sońynda 21 ǵasyrdaǵy eń uly vızıonerge aınaldy.