Jer máselesi týraly komısıa múshesi Muhtar Taıjan men "El men Jer" qoǵamdyq qozǵalysynyń múshesi Erkin Raqyshevtyń arasynda debat ótti.

Pikirtalas bıznes-trener Ahmetbek Nursılanyń YouTube arasynda tikeleı efırde uıymdastyryldy. 

"Debatqa belsendi Rústem Esimhanuly sarapshylyq jasaıdy" dedi Ahmetbek Nursıla.

– Qarap otyrsam, meniń aýyldastarym, synyptastarym, tanystarym bul máseleni bilmeıdi. Eldiń taǵdyry, jerdiń taǵdyry sheshilip jatqanynan habary joq eken. Prezıdent úkim shyǵardy. Jer sheteldikterge satylmasyn, jalǵa da berilmesin dedi. Endi jer Qazaqstan azamattaryna satyla ma? Jalǵa berile me? Onyń arty qalaı bolady? Qansha jylǵa beriledi?, – dedi Nursıla Ahmetbek debatty ashyp.

Kásipkerdiń aıtýynsha, Taıjan da, Raqyshev ta jer máselesi úshin kúresip júr. Alaıda, ekeýiniń pikiri uqsamaıdy.

Raqyshev Jer komıısıasy quramyndaǵy Taıjandy "halyqty aldap júrgen alaıaq" dep aıyptaıdy. Biraq Muhtar Taıjan komısıada shyn nıetimen halyq úshin, jer úshin kúresip júrgenin aıtady.

Sonymen qatar, debatta Taıjannyń mınıstrler men depýtattar qatysqan komıısıa otyrysynda sheshimderge qarsy shyqqany aıtyldy.

Degenmen, Raqyshev onyń bári kózboıaýshylyq dep sanaıtynyn jetkizdi. 

– Men Muhtarmen ǵana emes, jalpy Jer komıısıasymen kelispeımin. Bul halyqtyń nazaryn basqa jaqqa aýdarý úshin qurylǵan komıısıa. Al Muhtar sonyń beldi múshesi. Olar qazir nemen aınalysyp júr. Olar kózboıaýshylyqpen aınalysyp júr. Bul Muhtarǵa da, komısıaǵa da qatysty... Bulardyń maqsaty Qazaqstannyń jerin Qytaıǵa orman, toǵaı ósirýge 25 jylǵa berýge zań qabyldanyp jatqanda, komısıada otyryp alyp, bir-birimen qyrqysyp, halyqtyń nazaryn basqa jaqqa aýdarý, – deıdi Erkin Raqyshev.

Al Muhtar Taıjan ne úshin komısıa quramyna kirgenin túsindirdi.

– Zańdy ózgertýdiń basqa joly joq. Ol úshin tek qana bılikpen bir ústelde otyrý kerek. Óıtkeni zań qabyldaıtyn májilis, úkimet, sosyn prezıdent qol qoıady. Biz osynda otyryp zańdy ózgerte almaımyz. Sol úshin men Jer komısıasyna kirdim. Aqpan aıynda prezıdent Qasym-Jomart Toqaev jer sheteldikterge satylmasyn, jalǵa da berilmesin dep jarıalady. Sosyn prezıdenttiń tapsyrmasy boıynsha arnaıy zań daıyndaldy. Sol zań májiliske kelip, sosyn senatqa ketti. Sol zań jobasy talqylanǵan kezde tórt depýtat aǵash ósirý úshin jer sheteldikterge jalǵa berilsin dep usyndy. Men muny barshańyzben birge estidim. Aldymen mynadaı aqparatshyqty. Ormandar sheteldikterge beriledi dep shyqty. Álbette, bul aqparat jalǵan. Sebebi ormandardy eshkim jalǵa bere almaıdy, – degen Taıjan depýttardyń usynysyna qatysy joǵyn, oǵan daýys bermegenin, tipti qarsy bolǵanyn aıtty.

Taıjannyń aıtýynsha, senatorlar kóńil aýdaryp, ondaı zań normasyn ótkizbeıtinin málimdegen.

"Sondyqtan bul norma alynyp tastalady dep esepteımin" deıdi ol.