1. Eń basty, mańyzdy jańalyq – Reseıdiń Syrtqy ister mınıstri Sergeı Shoıgýdyń RF armıasyn Ýkraına shekarasynan keri áketýge tapsyrma bergeni bolyp tur. Reseı shyndyǵynda Batystyń Ýkraınany qoldaýda birtutas bolyp birikkeninen, NATO-nyń da Ýkraınaǵa naqty kómek kórsete bastaǵanynan, ýkraındyqtardyń ózderiniń de eshteńeden taısalmaı bopsaǵa shydaı bilgendiginen seskendi. Árıne, Pýtınniń klımat jónindegi Samıtke qatysyp, álem kóshbasshylary aldynda 5 mınýt bolsa da teledıdar aldynda sóıleýge múmkindik alǵany da óz áserin tıgizgeni anyq, ol ony tolyq ızolásıadan saqtap qalǵandaı áser týǵyzdy.

2. Chehıa men Reseı arasyndaǵy dıplomatıalyq janjal tym tereńdep, jańa satyǵa kóterilgen sıaqty. Aldymen Chehıa eskertý berdi – "biz sizderdiń dıplomat-shpıondaryńyzdy elden shyǵarsaq ol ózderiniń naqty is-áreketteri úshin shyǵarylyp otyr, al sizderdiń bizdiń dıplomattardy qýǵanyńyz aqylǵa syıymsyz, osymen toqtaıyq" dedi. Soǵan qaramastan Reseı 18 adamnyń ornyna 20 adamdy elderinen shyǵaryp jiberdi. Buǵan Praga últımatým qoıdy – endi Chehıadan Reseıdiń 70 dıplomaty qýylatyn boldy.

3. AQSH sanksıalaryna qaramastan Germanıa "Nordstrım-2" gaz qubyryn salýdy aıaqtaýy múmkin. Aldaǵy kúzde kanslerlikten ketkeli otyrǵan Angela Merkel bul suraqqa ekiushty jaýap qaıtarýda, shamasy Germanıa bıznesi aldynda eshkimmen jamanattasyp jatqysy kelmeıtin sıaqty. Polsha premer-mınıstri Mateýsh Moraveskıı Germanıaǵa "Nordstrım-2" qurylysynda eýropalyq yntymaqtastyqty buzbaýdy suraǵanyn búgingi pres-konferensıada aıtty.

4. Sońǵy kúnderi Ýkraınaǵa kem degende úsh ret NATO-nyń áskerı-transport ushaqtary kelip qondy.

5. NATO-nyń Samıti 14 maýsymǵa belgilenip otyr. Kún tártibindegi negizgi taqyryp – Reseıdiń Ýkraınaǵa qarsy agresıasy.

6. AQSH mem. departamentiniń spıkeri Ned Praıs Ýkraınaǵa áskerı kómek odan ári jalǵasa beretinin aıtty. "Biz Ýkraınamen áriptestigimizge berikpiz. Bul biz úshin óte mańyzdy. 2014 jyldan beri Ýkraınanyń qaýipsizdigi salasyna Reseı agresıasynan qorǵaný úshin 2 mlrd dollardan astam kómek berildi, onyń ishinde letaldy qorǵanys júıeleri de bar" dep málimdedi Praıs. Sondaı-aq Senattyń halyqaralyq qatynastar komıteti "Ýkraınamen qaýipsizdik salasyndaǵy áriptestik" zań jobasyn maquldady. Komıtet tóraǵasy Robert Menendes muny Ýkraınany qoldaýdaǵy der kezinde jasalǵan sıgnal dep atady. "Jeti jyl boıy ýkraındyq áskerler ýkraınanyń egemendigi men qaýipsizdigin buzyp otyrǵan reseılik agresıadan jerde, teńizde jáne kıbershabýyldarynan janqıarlyqpen qorǵanyp keledi" dedi ol.

7. Slovakıa Reseı elshiliginiń 3 dıplomatyn (shpıonyn) jeti kún ishinde elden ketiretin boldy.

Qýanysh Edilhantegi

Sholýshy