Ádette prezıdentterdiń alǵashqy 100 kúnine esep berip jatady. Osy aptada Baıden AQSH bıliginiń basyna kelgenine 100 kún tolady. Soǵan baılanysty ol kelgeli ne bitirdi degen suraqqa jaýap berilip jatyr eken.

Sonymen, ol kelgeli birneshe myqty, negizgi fıgýralar taǵaıyndalyp, olardyń Senat arqyly bekýine qol jetkizildi:

● Barlaý agenttiginiń basshysy, Memlekettik departament basshysy, Ortalyq Barlaý Basqarmasy basshysy, Pentagon basshysy, Bas prokýror jáne taǵy basqalar; 

● 200 mln vaksına jetkizildi, sóıtip ol óziniń saılaýaldy ýádesin artyǵymen oryndaǵan;

● Reseıge qarsy úsh sanksıa paketin salyp úlgergen;

● Reseıge qarsy tutas batystyq kampanıa uıymdastyra alǵan. Bul jańa qyrǵı-qabaq soǵysynyń bastaýy dese de bolady;

● Reseıdiń Ýkraına shekarasyndaǵy áskerı arandatýyn zergerlik dáldikpen toıtardy. Pýtın ózi ańsaǵan AQSH kóshbasshysymen kezdeskenshe Ýkraına úzilis aldy, endigisin ýaqyt kórsetedi.

● Ýkraınanyń batyp jatqan batpaǵyn qorys qyldy, endi az da bolsa Ýkraınada kapıtýlásıadan góri qarsylasýǵa degen trend paıda boldy. Sondyqtan Kreml jaqtan únemi zarlanǵan, jylanǵan daýystar estilip jatady, óıtkeni Baıdenniń Ýkraınadaǵy saıasaty Tramptyń kezindegiden 180 gradýsqa ózgergen;

● Qytaıǵa qarsy myqty qadamdar jasady. Alǵashqy sanksıalar salynyp bastady;

● COVID-19-dyń saldarymen kúresýge baǵyttalǵan 1,9 trln dollar kómek respýblıkashyldardyń jappaı qarsylyǵyna qaramastan júzege asty. Kómektiń ekinshi paketi de (2 trln dollar) jaqyn. Bul AQSH ekonomıkasynyń kúrt damýyn týǵyzbaı qoımaıtyny álden-aq baıqala bastady.

● Alǵashqy 100 kúnde AQSH qor bırjasy eń úlken ósimge qol jetkizdi. Mundaı ósim sońǵy ret tek Dýaıt Eızenhaýer kezinde ǵana bolypty. Qor bırjasy saıasattan tys, tek qana ekonomıkanyń kúrt ósýine senedi desek, ıaǵnı ekonomıka ósip jatqany. 

● Baıdenniń reıtıńi turaqty túrde 50%-dan joǵary (Trampta alǵashqy 100 kúnde 42% ǵana boldy).

Qýanysh Edilhantegi

Sholýshy