"Vashıngton áskerı kúshteri osy demalys kúnderi atmosferaǵa qaıta oralady dep kútilgen iri qytaılyq zymyrannyń qaldyqtaryn atýdy josparlap otyrǵan joq" dedi AQSH qorǵanys mınıstri Lloıd Ostın.

Jýrnalısermen suhbattasqan Ostın zymyrannyń muhıtqa qulaıtynyna úmit bar ekenin jáne sońǵy boljam boıynsha, onyń senbi men jeksenbi aralyǵynda túsetindigin aıtty.

– Bizdiń kóp nárseni isteýge múmkindigimiz bar, biraq  zymyrandy atyp tastaıtyn josparymyz joq. Biz onyń eshkimge zıan tıgizbeıtin jerge túsetinine úmittimiz. Ol muhıtta nemese soǵan uqsas jerlerge qulaıtyn bolar dep úmittenemin, – dedi Ostın.

Beıjińniń "Long March 5B" dep atalatyn zymyrany 29 sáýirde Qytaıdyń Haınan aralynan ushqan. 

Zymyrannan shyqqan synyqtar AQSH-tyń shyǵys qalalaryn basyp ótkennen keıin ekvator mańynda Tynyq muhıtyna túsedi dep kútilýde. Aq úıdiń baspasóz hatshysy Djen Psakı sársenbide AQSH ǵarysh qoqystarynyń qaýip-qaterlerin sheshýge bel býǵanyn jáne halyqaralyq qaýymdastyqpen "kóshbasshylyqty, jaýapty ǵaryshtyq minez-qulyqty ilgeriletý úshin" jumys istegisi keletinin aıtty.

"Ǵaryshtyq domende jumys jasaıtyn biz úshin qaýipsiz nemese oılastyrylǵan rejımde jumys isteýdiń bir talaby bolýy kerek" dedi AQSH qorǵanys mınıstri.

Al qytaılyq tabloıd Global Times basylymy sala ınsaıderlerine silteme jasap, zymyran "baqylaýdan tys" jáne "zıan keltirýi múmkin" degen habarlardy "batystyq haıp" dep sıpattap, "úreılenýdiń qajeti joq" dep málimdedi.