Tesla kompanıasynyń bas atqarýshy dırektory Ilon Mask kompanıa kólikterin Bitcoin arqyly satý josparyn ózgertkenin jarıalady.

"Tesla kompanıasy Bitcoin arqyly kólik satýdy toqtatty. Bitcoin óndirisi men tranzaksıalar úshin qazba otyndaryn, ásirese kómirdi qoldanýdyń jyldam ósetini bizdi alańdatady. Krıptovalúta keremet jaqsy ıdeıa jáne biz onyń bolashaǵy zor dep sanaımyz, biraq bul qorshaǵan ortaǵa zıan keltirý esebinen bolmaýǵa tıis. Tesla eshqandaı Bitcoin satpaıdy jáne ol turaqty energıaǵa kóshken soń ǵana tranzaksıalar úshin qoldanbaqpyz. Sondaı-aq biz Bitcoin energıasy tranzaksıasynyń 1%-yn ǵana qoldanatyn basqa krıptovalútalardy qarastyramyz" dep jazdy Mask Twitter paraqshasynda.

Negizgi ınvestorlar men Tesla, Square, Metromile jáne Nexon sıaqty kompanıalar Bitcoin satyp alǵan. Degenmen olar sıfrlyq valútany yqtımal ınflásıalyq hej retinde qarastyrady. Sonymen qatar, AQSH ortalyq banki pandemıa kezindegi ekonomıkalyq aýyrtpalyqty jeńildetý úshin aqsha basyp shyǵarǵan.

Goldman Saks jáne Morgan Stenlı sıaqty Ýoll Strıttiń iri bankteri de ózderiniń aýqatty klıentterine Bitcoin usynýǵa tyrysty.

Biraq  Softbank-tyń  negizin qalaýshy Masaıoshı Son sıaqty keıbir ınvestorlar áli kúnge deıin krıptovalútaǵa qulshynys tanytpady.

"Jaqsy nemese jaman nárse bola ma, shyn máninde bul baǵa kópirshigi me degen taqyrypta kóptegen pikirtalastar júrip jatyr. Shynymdy aıtsam, men bilmeımin" dedi Son.

2021 jyldyń birinshi toqsanynda Tesla 1,5 mıllıard dollarǵa "sandyq aktıvterdi" satyp aldy, sodan keıin 272 mıllıon dollarǵa biraz bóligin qaıta satty. Tesla-nyń 26 sáýirdegi qarjylyq málimdemesine sáıkes, Bitcoin satýdan kompanıaǵa 101 mıllıon dollar paıda túsken.