AQSH Palata spıkeri Nensı Pelosı Qytaıdaǵy adam quqyǵynyń buzylýyna baılanysty kelesi jyly Beıjińde ótetin Qysqy Olımpıada oıyndaryna dıplomatıalyq boıkot jarıalaýǵa shaqyrdy.
Pelosı Qysqy Olımpıadaǵa barlyq memleket basshylary qatyspaýy kerek ekenin aıtty.
Spıker Qytaıda eshnárse bolmaǵan sıaqty Olımpıada oıyndarynyń óte berýi durys emes dep esepteıdi.
BUU jáne halyqaralyq adam quqyǵy uıymdary Qytaıdyń soltústik-batysyndaǵy úlken aımaq Shyńjańda Beıjiń mıllıonnan astam qazaq jáne uıǵyr musylmandaryn qamap otyrǵanyn aıtady.
Olardyń aqparatyna sáıkes, Shyńjańda ustalǵandardyń kópshiligi "qaıta tárbıeleý" mekemeleri dep atalatyn túrme tárizdi lagerlerge jiberilgen. Olar belgisiz ýaqytqa qamalady.
Demokrat Pelosı eki partıaly kongrestegi tyńdaý barysynda búkil álemniń memleket basshylary aqpan aıynda ótetin Qysqy Olımpıada oıyndaryna boıkot jarıalaýy kerek dedi.
"Memleket basshylary Qytaıǵa barmaý arqyly Qytaı úkimetin qurmettemeıtinimizdi kórseteıik. Memleket basshylary Qytaıda bolyp jatqan genosıdke baılanysty barýy kerek. Sizder ózderińizdiń oryndaryńyzda qalaı otyrsyzdar? Onsyz adam quqyǵy týraly, álemdegi kez kelgen jerde moraldyq bılik týraly qalaı aıta alasyzdar?" dedi ol.
Pelosı Qytaıdyń Shyńjań provınsıasyndaǵy qazaq, uıǵyr sıaqty azshylyq qaýymǵa jasalǵan qysymǵa qatysty boıkot jarıalaýǵa shaqyrǵan sońǵy amerıkalyq saıasatker. Buǵan deıin Maık Pompeo jáne Baıden ákimshiligindegi birneshe amerıkalyq saıasatkerler Shyńjańdaǵy azshylyqtarǵa jasalǵan saıasatty "genosıd" dep baǵalaǵan.
Sonymen qatar, AQSH, Kanada, Ulybrıtanıa, Nıderlandy sıaqty elder Qytaıdyń batys bóligindegi musylman halyqtaryna júrgizgen saıasatyn resmı túrde "genosıd" dep atady. Germanıa, Belgıa, Shvesıa, Jańa Zelandıa sıaqty kóptegen elderdiń parlamenti aımaqtaǵy problemany "genosıd" dep jarıalaýdy kóterdi.
Qytaı úkimeti Shyńjańdaǵy etnıkalyq azshylyq áıelderine májbúrli sterılızasıa júrgizdi jáne balalardy otbasylarynan bóldi dep aıyptaldy.
Bastapqyda Beıjiń lagerlerdi joqqa shyǵarǵan. Keıinirek olardy terorızmge qarsy qajetti shara dep jarıalady. Beıjiń adam quqyǵyn buzý týraly aıyptaýlardy joqqa shyǵarady.
