Ońtústik Qytaı teńizindegi shıelenis qaıta kúsheıe tústi. AQSH daýly aımaqqa joıǵysh kemelerin jiberdi. Jaǵdaıǵa baılanysty Avstralıanyń burynǵy general-maıory Qytaı men AQSH arasyndaǵy úlken soǵys qaýpi týraly aıtty, dep jazady avstralıalyq SkyNews basylymy.

Ońtústik Qytaı teńizindegi shıelenister seısenbi, sársenbi kúnderi taǵy da ýshyqty. Taıvan buǵazy arqyly Vashıngtonnyń basqarylatyn zymyran esmınesi ótkennen keıin Beıjiń AQSH-ty "arandatýshylyq jasady" dep aıyptady.

Aımaqtaǵy shıelenis qaqtyǵys qorqynyshyn kúsheıtti. AQSH Áskerı-teńiz kúshteri "Arleigh Burke" klassyndaǵy basqarylatyn "USS Kertıs Ýılbýr" zymyran joıǵyshyn daýly aımaqqa attandyrdy.

"Taıvan buǵazy arqyly soǵys kemesiniń júzýi AQSH-tyń Úndi-Tynyq muhıty aımaǵynyń erkin jáne ashyq bolýyna degen mindettemesin kórsetedi. Amerıka Qurama Shtattarynyń áskerı kúshteri halyqaralyq zań ruqsat etken jerlerde ushýdy, júzýdi jáne  jumys isteýdi jalǵastyrady" dep málimdedi Vashıngton tarapy.

Biraq Qytaı "AQSH-tyń Áskerı-teńiz kúshteri aımaqtaǵy tynyshtyqty buzdy" dep aıyptady.

Qytaıdyń Shyǵys teńiz kúshteriniń ókili "AQSH-tyń áreketteri Taıvannyń táýelsizdik kúshterine durys emes sıgnaldar jiberedi jáne aımaqtyq jaǵdaıdy ádeıi buzyp, Taıvan buǵazyndaǵy beıbitshilik pen turaqtylyqqa qaýip tóndiredi" dedi.

Al, Avstralıanyń burynǵy general-maıory Qytaı Taıvandy kúshpen qaıtaryp alý týraly sheshim qabyldaǵan jaǵdaıda AQSH pen Qytaı arasynda "óte úlken soǵys" bolatyny týraly eskertti.

"Qytaıdyń kórshilerine qatysty ustanymy barǵan saıyn agressıvti sıpatqa ıe boldy jáne onyń rıtorıkasy odan saıyn órship tur" deıdi avstralıalyq otstavkadaǵy general-maıor jáne lıberal-senator Djım Dolan SkyNews basylymyna bergen suhbatynda.