Eýropalyq odaq Mınsk jýrnalıs Roman Protasevıchti qamaýǵa alý oqıǵasynan keıin Belarýstiń áýe kompanıalaryna Eýropa aspanynda ushýǵa tyıym salý týraly sheshim qabyldady.
Brússeldegi kezdesýde 27 memleket basshysy EO avıakompanıalaryna Belarýs ústinen ushyp ótpeýdi buıyrdy jáne ekonomıkalyq sanksıalardyń odan ári jalǵasýyna ýáde berdi.
Al AQSH prezıdenti Djo Baıden Belarýs bıliginiń áreketin "shekten shyqqan" dep aıyptap, bul "saıası kelispeýshilikke de, baspasóz bostandyǵyna da uıat shabýyl" dep málimdedi.
Ryanair ushaǵy jeksenbide Eýropa odaǵy elderiniń ishki reısin oryndaý barysynda Grekıa astanasy Afınydan Latvıa astanasy Vılnúske ushyp bara jatyp, "bortta bomba bar" degen sebeppen ıstrebıtelderdiń kómegimen kúshtep Belarýs astanasy Mınskke qondyrylǵan. Ushaq qonysymen, bomba týraly aqparat ótirik bolyp shyqqany habarlanyp, bortta bolǵan 26 jastaǵy jýrnalıs Roman Protasevıch pen súıiktisi Sofıa Sapega qamaýǵa alynǵan.
Batys elderi Belarýssıany Ryanair ushaǵyn "barymtalady" dep aıyptady.
Reıs baǵyty qalaı ózgertildi?
FR4978 reısi Lıtva shekarasyna jetkenine kóp bolmaı, Mınske qaraı batysqa burylady.
Ryanair málimdemesinde ekıpaj múshelerine Belarýs áýedıspecher qyzmetinen bordtaǵy yqtımaldy qaýip týraly habarlama kelip, jaqyn mańdaǵy Mınsk áýejaıyna qoný týraly nusqaý berilgeni aıtylady.
Flightradar24 saıtynda kórsetilgen ushý traektorıasyna sáıkes, ushaq burylǵan sátte Mınskke qaraǵanda Vılnúske jaqyn bolǵan.
Keı jolaýshylar ınsıdent bastalǵanda Protasevıchtiń mazasyzdanǵanyn kórgenin aıtqan. "Ol ózine ólim jazasy qaýpi tónip turǵanyn aıtty" degen 40 jastaǵy Monoıka Sımkıene AFP agenttigine.
Basqa jolaýshy Reuters-ke Protasevıch jaǵdaıdy bilgende noýtbýgy men telefonyn joǵarǵy shkaftan shyǵaryp, janyndaǵy súıiktisine bergenin habarlaǵan. Alaıda Lıtva prezıdenti Protasevıchtiń serigine ushaqqa oralýǵa ruhsat etpegenin málim etti.
Sapeganyń anasy VVS-ge jigitti Mınsk túrmesine aparylǵanyn jáne onyń WhatsApp messendjerinde sońǵy ret "mama" dep jazǵanyn aıtqan. Sapegaǵa qandaı aıyp taǵylǵany ázirge anyq emes.
Protasevıch kim?
Protasevıch Nexta medıa-kompanıasynyń, Telegram kanalynyń burynǵy redaktory. Ol 2019 jyly Belarýsten ketip, 2020 jylǵy prezıdent saılaýy barysyn aqparattandyryp otyrǵan. Nexta Belarýstegi prezıdent saılaýy kezinde opposısıanyń daýys berýinde sheshýshi ról atqardy. Opozısıa Lýkashenko daýys urlady dep sanaıdy. Úkimet jańalyqtardy taratpaı qoıǵannyn keıin bul pikirdegi adamdar kóbeı tústi. Osydan keıin oǵan terorızm men tártipsizdikti qozdyrý boıynsha aıyp taǵylǵan.
Batys lıderleri opozısıa basshysy kandıdat Svetlana Tıhanovskaıany qoldaǵan. Saılaýdan keıin Lýkashenkonyń jeńisine narazy ondaǵan myń adam birneshe aı boıǵy alańǵa shyqqan. Narazylyq aksıasyna shyqqandardy jergilikti polısıa uryp-soqqan, azaptaǵan áreketter kóptep bolyp, ondaı jaǵdaılardy Nexta udaıy jarıalap otyrǵan. Bıyldyń ózinde polısıa talapynan jasalǵan aıaýsyz áreketterdiń kóptegen jaǵdaılary tirkelip, 2700-den astam sottaý isteri bolǵan.
Aleksandy Lýkashenko Belarýsti 1994 jyldan beri basqaryp keledi. Ol prezıdent retinde 6 márte qaıta saılanǵan. Onyń saıasatta "Eýropanyń sońǵy dıktatory" degen aty bar.
Pikir qaldyrý