AQSH prezıdenti Djo Baıden Qurama Shtattarda koronavırýstyń jańa Delta nusqasy tirkelgeni týraly eskertti. Aqparatqa sáıkes, bul – basqa nusqalarǵa qaraǵanda áldeqaıda tez taralady.

Bul nusqa Úndistanda paıda bolyp, kóktem kezinde Ulybrıtanıada tarala bastaǵan. Jańa vırýs tez taralý saldarynan, Ulybrıtanıa premer-mınıstri Borıs Djonson el boıynsha lokdaýndy aıaqtaý ýaqytyn bir aıǵa keshiktirýge májbúr boldy.

AQSH aýrýlardy baqylaý jáne aldyn alý ortalyǵy Delta-ny "alańdaýǵa tıisti mańyzdy jaǵdaı" dep sanaıdy. Jańa vırýstyń AQSH-taǵy taralýy artyp keledi. Keıbir sarapshylar Qurama Shtattardaǵy jabylý men shekteýler qaıta bastalýy múmkin deıdi. Al, qarjylyq mamandar "Lokdaýn qaıta bastalsa, álemdik jetekshi ekonomıka esepteletin AQSH ekonomıkasy qaıta álsireýi yqtımal, bul ǵalamdyq daǵdarysqa ákelýi múmkin" deıdi.